بیگواھیں نودربر رھشون زاکر مجید ءِ گس ءَ لُٹ پُل

سربوتگیں ھالانی رِد ءَ پاکستانی پوج ءِ دست ءَ زورانسری آوار جنگ بوتگیں نودربر رھشون زاکر مجید ءِ گس ءَ ناشناسیں مردماں لُٹ پُل کتگ-

بلوچستان ءِ دمگ ھزدار ءَ زاکر مجید ءِ گس ءَ ناشناسیں مردماں دؤر کُتگ ءُ لٹ پُل کتگ ءُ گس ءِ سرجمیں ازباب گوں وت برتگ انت –

بیگواھیں زاکر مجید ءِ گھار ڈاکٹر شبانہ مجید ءَ لُٹ پُل ءِ سرجمیں ھال داتگ انت ءُ گوشتگ کہ گِس ءَ ھما وھد ءَ لٹ پُل کنگ بوتگ وھدیکہ گس ءَ کس نہ بوتگ، ناشناسیں مردماں گس ءِ کُبل پُروشتگ ءُ اودے سرجمیں سامان گوں وت برتگ انت کہ آیانی تہ ءَ سُھر ءُ دگہ گرانھادیں سامان بوتگ انت –

ڈاکٹر شبانہ مجید ءَ ڈنگی ءِ بگیری ءَ دمگی تانہ ءَ ارزی نبشتہ کنائیں اِتگ – ارزی ءِ تہ ءَ نبشتگ کنگ بوتگ کہ دزی ھما وھد ءَ کنگ بوتگ وھدیکہ شبانہ مجید وتی کار ءُ کھول ءِ ھمراھی ءَ شال ءَ نندوک بوتگ وھدیکہ گس ءَ کس نہ بوتگ ـ ارزی ءِ تہ ءَ نبشتگ کہ ناشناسیں مردماں گس ءَ دور کتگ ءُ اودے گرانھادیں سامان گون وت برتگ انت کہ آیانی تہ سُھر ھم مان بوتگ –

ڈاکٹر شبانہ ءَ گوشتگ ناشناسیں مردماں گِس ءِ تہ ءَ دزی کنگ ءَ پد گس ءِ ڈن مانداشتگ ءُ شتگ انت –

دمگی مردماں گوں دی بلوچستان پوسٹ ءِ اھوالکار ءِ گوم ءَ تران کنان ءَ گوشتگ کہ گس ءِ نزیک ءَ سیاہ کانچیں گاڑی ءِ گندگ بوتگ بازیں مردمے ءِ گوشگ انت کہ دُزی ءَ پاکستانی پوج ءِ چیریں ادارھانی کارمند ھوار انت –

زاکر مجید ھشت جون سال دوھزار نُھ ءَ چہ مستونگ پڑنگ ءَ آوار جنگ ءُ بیگواہ کنگ بوتگ – آئی ءِ زورانسری آوار جنی ءِ بگیری ءَ آئی ءِ کھول یکشل ءَ زھرشانی کنگ ءَ انت – زاکر مجید ءِ گھار فرزانہ مجید ءَ وتی برات ءِ زور بیگواھی ءِ بگیری ءَ وی بی ایم پی ءِ ھمراھی ءَ شال تاں کراچی ءُ پدا اسلام آباد ءَ پیادگ پند بُراِتگ –

گوست ءَ زورانسری آوار جنگ بوتگیں بلوچ سیاسی رھشون ءُ باسکانی گساں پاکستانی پوج ءُ چیریں ادارھانی کارمند بیڑ برتگ آیانی کھول توپک ءِ زور ترسینتگ انت ـ وھدیکہ باز براں اے الزام ھم جنگ بوتگ کہ پوج ءُ چریں ادارھانی کشندہ ٹولیاں آیانی کھول ترسینتگ انت –