بلوچستان ءِ دمگ قلات ءُ زامران ءَ پاکستانی پوج سلاہ بندیں ارشانی تہءَ نشانگ کنگ بیتگ وھدیکہ بلیدہ ءَ بندگی شرکت ءِ گاڑی ماندارگ بیتگ۔
ٹی بی پی اھوال پترءَ سر بیتگیں اھوالانی ردءَ قلات ءِ ھنکین ہربوئی ءَ اسکلکو ءِ ھندءَ سلاہ بندیں مردماں پاکستانی پوج ءِ بنجل ءِ نشانگ کُتگ۔
لشکریانی سرءَ اُرش گوستگیں شپ ءَ کنگ بیتگ، اُرش ءِ تہءَ لشکریاں تاوان ءِ ھال اِنت البت واکدارانی نیمگ ءَ اے درگت ءَ ھچ پئیمیں درشان دیما نئیتکگ۔
ھمے دمگ ءَ تیل و گیس شوھازکنوکیں شرکتاں پھازگی دئیگءِ ھاترءَ بازیں ھنداں لشکریانی بنجل بندوک اَنت۔
دومی نیمگءَ زامران پُلکی ءَ سلاہ بندیں مردماں لشکریانی بنجل اُرش ءَ نشانگ کُتگ تتکگ اَنت۔
ھندی اھوالانی ردءَ اُرش ءَ پد پاکستانی لشکریانی نیمگ ءَ جتاھیں نیمگ ءَ مارٹر گولہ آس دیگ بیتگ اَنت البت کجام ھم پئیمیں تاوانانی ھال دنیگت نیست اِنت۔
بلیدہ ءَ سلو کور ءِ ھندءَ ناشناسیں مردماں بندوکیں شرکت ءِ یک گاڑی ءِ مانداشتگ۔
گوستءَ ھم بندوکیں شرکت بلوچ سلاہ بندیں آجوئی لوٹوکیں گلاں نشانگ کُتگ اَنت۔
اے اُرشانی داں انگت ھچ گل ءَ ذمہ واری نہ زُرتگ۔