روکپتی بلوچستان: ایرانی لشکر ءِ تیرگواری ءَ یک مردمے زدگ، دو دزگیر

روکپتی بلوچستان ءِ تیابدپی شھر چھبار ءَ ایرانی لشکر ءَ تیرگواری کنان ءَ یک مردمے زدگ کتگ ءُ دو دزگیر کتگ اَنت-

گیشیں اھوالانی روکپتی بلوچستان ءِ دمگ چھبار ءَ ایرانی لشکر ءَ روکیں گاڑی ءِ سر ءَ تیرگواری کتگ ءُ چریشی ءَ یک مردمے زدگ بیتگ، زدگ بیتگیں مردم نادراہ جاہ ءَ برگ بیتگ-

اھوالانی رد ءَ گوستگیں شپ ءَ ایرانی لشکر ءَ چھبار ءَ روکیں گاڑی ءِ سر ءَ تیرگواری کتگ ءُ چریشی ءَ فریدون رئیسی زدگ بیتگ ءُ آئی ءِ ھمراہ حمید رئیسی ءُ رضا بلیدی دزگیر کتگ ءُ گون وت برتگ اَنت-

اھوالانی رد ءَ اے مردمانی سیادی روکپتی بلوچستان ءِ دمگ نیکشھر ءَ اِنت ءُ ھرسئیں مردم چھبار ءَ روگ ءَ بیتگ اَنت –

اھوالانی رد ءَ اے مردمانی سر ءَ ھما وھد ءَ ایرانی لشکر ءَ تیرگواری کتگ اے مردم وتی راہ ءَ روگ ءَ بیتگ انت ءُ آیانی دارگ ءَ ابید ایرانی لشکر ءَ تیرگواری کتگ انت-

زانگ بہ بیت گوستگیں روچ ءَ ھم دلگان ءَ ایرانی لشکر ءَ یک ھبدہ سالیگیں ورنایے ئِے سر ءَ تیرگواری کتگ ءُ کشتگ ات –

کہ آئی ءِ پجار احسان یوسفزئی ءِ نام ءَ زانگ بیتگ ات ءُ اود ءَ آ تیرگواری ءُ کشگ ءَ پد آئی ءِ لاش ماں زاھدان ءَ برگ بیتگ ات ءُ پد ءَ اژدری چار ءُ ٹپاس ءَ پد واتر دلگان ءَ کھول ءِ دست ءَ دیگ بیتگ ات-

روکپتی بلوچستان ءَ تیرگواری ءِ وئیل ءُ مردمانی کُشگ ءُ زدگ کنگ لس جوڑ بیتگ کہ اے دابیں وئیل ھمک روچ پیش آیگ ءَ اَنت-