پاکستان مئے ھکاں بہ دنت اگاں ناں آجوئی ءِ ھاتر ءَ جنگ کنیں – منزور پشتین

بنگالیاں بس چڑی کش اِتگاں، پشتون ءُ بلوچ تئی پوست ءَ کش انت – پی ٹی ایم ءِ سرکماش ءِ ماں اسلام آباد ءِ مچی ءَ تران

پشتون تحفظ مومنٹ (پی ٹی ایم) ءِ ماں اسلام آباد ترنول ءَ زھرشانی مُچی – پی ٹی ایم ءِ اے مُچی گوستگیں روچ ءَ ماں اسلام آباد ءَ سپریم کورٹ ءِ دیم ءَ بوگی بوتگ بلے ریاست ءِ پاکستان ءِ نیمگ ءَ دو روچانی یکشل ءَ کریک ڈاؤن، دگانی بند بوگ پد اے مُچی ترنول ءَ کنگ بوتگ – سدانی کچ ءَ درنگاز کنوکانی دزگیری ءُ دو روچاں یکشل ءَ کریک ڈاؤن ءَ ابید ھم مزنیں کچے ءَ مردماں پی ٹی ایم ءِ ماں اسلام آباد ترنول ءَ اے مُچی ءَ بھر زرتگ ءُ مچی سوبمند کُتگ –

پی ٹی ایم ءِ سرکماش منزور پشتین ءَ مُچی ءَ تران کنان ءَ مردمانی منت گپتگ ءُ گوشتگ کہ اسلام آباد سپریم کورٹ ءِ دیم ءَ مروچی ھما مردمانی زھرشانی اوپار کنگ نہ بوتگ کہ گوستگیں بیست سالاں اے ریاست ءِ ٹوپ ٹینک، جھاز، وتکش بمبار، اکسٹرا جوڈیشیل کلنگ ٹارگٹ کلنگاں کہ بیگواھیں مردم اوپار کنگ ءَ انت – ما آیانی تیر اوپار کتگ انت ، آ مئے گپانی گپانی گوشدارگ ءَ اوپار کت نہ کناں – بلے شما باور بہ کنے مرچی من ھما گپاں کناں اے مگروراں اجیب لگ انت کہ مروچی شما مارا وتی پریات ءِ گوشدارگ ءَ داشتگ بلے گوستانک ءَ اے مئے بے سوبی نہ انت شُمے بے سوبی زانگ بیت – من اشی ءَ مرچی شمے دیم ءَ پدر کُت نہ کنان بلے مناں لھتے سالے موہ دیگ بہ بیت کہ من اے گپاں راست کناں کہ شما مرچی مئے راہ داشتگ اے مئے ردی نہ بیتگ شمے ردی بیتگ –

آئی ءَ تران کنان ءَ گوشتگ کہ من پشتون دمگانی جیڑوانی سرا گپ جنگ لوٹاں کہ منی وتن شانگلہ مردم ھمک روچ اشکرانی کاریزاں مرگایاں، کدی ٹارگت کلنگ ءَ کشگ بوگ ءَ انت بلے اے ریاست ءِ ھچ ادارہ ءَ ھچ پارلمنٹ ءُ آمیدگساں اے گامگیج نہ زرتگ کہ اے مزور چہ مرگ ءَ بہ رک انت – منی سوات ءِ ھزاراں مردم بیگواہ انت ، ایکسٹرا جوڈیشل کُشگ بوتگ انت، آیانی زمینانی سر ءَ کبزہ کنگ بوتگ، اودا اے ملک ءِ پوج ءَ کبزہ کتگ اودے مردم موٹر وے ءِ نام ءَ وتی زمین ءُ کشت ءُ کشاراں زبھر کنگ بوگ ءَ انت – دِر ءِ مردم بربادی ءِ زند گوازینگ ءَ انت اودا مکھی ءِ کشار ھم نیل انت کہ اشانی تہ ءَ ناشرکار گوز انت – مرچی دِر مردماں ھچ نسیب ءَ نیست بلے اے ملک ءِ جرنیل باپاری کنگ ءَ انت، دِر ءِ مردمانی تہ ءَ ترس ءِ ودّینگ بوتگ کہ شمارا جنگ بیت اودا راجکاری ءِ سر ءَ بندش انت مئے باسک ھمک دومی روچ ءَ پولیس کارگس انت کہ در سرڈگار ءَ شما پشتون یونٹی ءِ نام ءَ توار چست کت نہ کنے – گلامی گلامی انت – مالا کنڈ ءَ نشہ ءِ باپاری بوگ ءَ انت اودے ورنا وھدیکہ آیانی بگیری ءَ اوشت انت گڈا شھید کنگ بنت روچ مروچی آھاں انساپ نہ رستگ – مردان ءِ باپاری ءَ ھپت ھزار دکاناں بگر تاں آروسی مراگش جاھاں درسیں جاھاں پوجیانی کبزہ انت – سوابی آپ ءِ چمگ ءَ ھمدا کہ ڈیم انت کہ لین پیداک بیت بلے سوابی ءَ لین دیگ نہ بیتگ –

آئی ءَ گوشتگ کہ اگاں پشاور ءَ بیائے ھمک روچ تراک کنگ بیت کدی پوج ءِ نام ءَ کدی سی ٹی ڈی ءُ کدی دگہ ناشرکارانی نام ءَ پشتون کشگ بوگ ءَ انت، خیبر پختون ءَ نا مسیت پھریز انت ءُ نا گس، ھر روچ ھون ریزی بوھگ ءَ انت، موھمند ءِ ھمے ھال انت، باجوڈ ءَ چار ھزار ٹارگٹ کلنگ کنگ بوتگ – من کہ اودا شُتگاں اودے ورنا دیستگاں، منی گندگ ءَ آ گل بوتگ انت من ھیران بوتگاں کہ زرمبشت ءِ گوم ءَ آیانی مھر دیستگ – پدا یک سنگتی ءَ گُشت کہ ھما ٹارگٹ کلنگاں کہ شھید بوتگ انت اے ھماھانی پُسگ انت کہ مروچی اے زرمبشت ءِ ھک ءَ اوشتاتگ انت – ابوزر یک زھگے بوتگ ھپت گھارانی یکیں برات کہ آئی ءَ وتی مات ءُ گھارانی ھاتر ءَ چپس بھا کتگ ءُ دو وھدے نان درگپتگ ھمے ریاست ءِ پالیسیانی سوب ءَ یک روچے ابوزر ءِ روزی ناں آئی ھون ریتکگ انت – اے ملک ءُ مقتدرہ ھاکمانی دیم ءَ ما وتی پریات ءَ ایر کنگ لوٹیں کہ نارتھ وزیرستان ءِ ھپسد مات گریوگ ءَ انت، جنوبی وزیرستان ءَ ھمک روچ کسان کسانیں چک مائنانی آماچ بوان انت نمیران بوگ ءَ انت – لکھی مروت ایمنی ءِ گھوارہ بوتگ مروچی بدامنی ءِ آماچ انت، جانی خیل ءَ مروچی رؤگ گوشگ بوتگ کہ پوجی زور ءَ ما شمارا وتی گساں چہ در کنیں – خرم ءَ سنی شیا ءِ پسات پیداک کنگ بوگ ءَ انت – اورکزئی ءِ مردم آئی ڈی پیز جوڈ بوتگ انت لھتے سال ساری اشاں برتانیہ لھتے پوجی زرتگ ءُ ھما جاہ ءَ شتگ کہ اودا مئے کماشاں پرنگی جتگ انت ءُ پاکستانی پوج ءَ آیانی دیم ءَ گوشتگ کہ ادا دژمن ٹک اتکگ انت آیاں مئے بزاں پرنگی پوجی جتگ انت – ژوپ ، قلعہ سیف اللہ، شیرانی تراک بوگ ءَ انت-

آئی دیمتر ءَ وتی تران ءِ تہ ءَ لورلائی ءَ بگر تاں ھرنائی ءَ شمے مڈی پُلگ بوگ ءَ انت زیارت ءِ زمینانی سر ءَ کبزہ کنگ بوگ ءَ انت شال ءَ چل ھزار ءَ گیش ایکڑ زمینانی سر ءَ کبزہ کتگ، قلعہ عبداللہ ءَ بدمعاش جوڈ کنگ بوتگ ءُ آیاں ریاست ءِ کمک گون انت ءُ آ مردماں جنگ ءُ کشگ ءَ انت – چمن گیٹ ءَ کسان کسانیں چُک کہ روزگار ءَ رؤنت لت شاپ کنگ بنت – پشتونانی ننگ آبرو برگ لگتمال بوگ ءَ انت –

آئی گوشتگ کہ پاکستان ءِ ھاکم گوش بہ دار انت کہ آیاں اے ملک اے وڈ چلائینگی انت گڈا ما آجوئی لوٹیں، پہ آجوئی ءَ جنگ کنیں – ما نوں چدوگیشتر وتی ماتانی ارسیگیں چماں چاریت نہ کنیں، ما وتی براتانی جونانی ھوناں چاریت نہ کنیں – نون بس یک گپ یے بیت کہ مارا زند ءِ ھک دیگی انت یا آجوئی ءِ جنگ بیت – نوں چدو گیشتر تو چتو مارا جنے، ھشتاد ھزار مئے مردم، مئے ملا، ھشتاد ھزار منی ڈیھے ورنا تو جتگ انت، زالبول نہ بکش اِتگاں، وانگجاھانی سر ءَ تو بمبگواری کتگ، ما مروچی ھم ھما زھگانی مانشجاھاں رؤئیں مارا درد بیت – اے دردانیں ھمراھی ءَ نوں چدوگیشتر زند گوازینگ نہ بیت، اوپار ھلاس بوتگ انت –

آئی ءَ گوشتگ کہ چیف جسٹس ءُ سیاسی رھشون گوشبدار انت ھما سیاسی رھشون کہ جرنیلانی گلام انت واللہ ما یکرندے کہ بندات کرت پدا یکے ھم بکشگ نہ بیت، مئے زند گوازینگے درسیں در بند کنگ بوتگ انت، مئے دمک ءُ درانی تہ ءَ تئی پوج ءُ آئی ایس آئی ءُ تالبانی ٹولی تر ءُ گرد کنگ ءَ انت – مئے کسانیں زھگ ترس آماچ انت نوں چدوگیشتر ما اے کنفوژن ءِ تہ ءَ نہ بہ ایں کہ تالبان چتا ٹولی ءِ اے جرنیلانی پیداوار انت، وتی پیداواراں بہ دار ات – ادے سیاسی رھشون گوش بہ دار کہ گوستگیں روچ ءَ یکےءَ مناں جست کتگ ات کہ ملک ءِ جاور چون انت من ھمے گشت کہ کجام ملک؟ ادا ھچ ملک نیست لھتے بدماش گنڈہ گردیں جرنیلاں تاکت ءِ جوڈ کتگ اشی ءِ کبزہ کتگ، ءُ اے وتگڑیں پارلمنٹ ھما گنڈیانی زلورت انت – دنیائے پیشدارگ ھاتر ءَ آیانی گوم ءَ باپاری کنگے ھاتر ءَ وتگڑیں پارلمنٹ جوڈ کتگ انت – اے آمیدگس ھم جھان پیشدارگ ءَ جوڈ کنگ بوتگ انت کہ ادا وٹسپ گروپانی سر ءَ چلگ انت بزاں ادا ھم امیدگس ءُ جج ھست انت – اے دراھ گلت پھمی انت کہ جھان ءِ پیشدارگ ءَ اے جرنیلاں جوڈ کتگ انت – ادا ھچ پولیس ادارہ نیست ھنو من یک ایس ایچ او ءِ دیستگ آئی ءَ گوشتگ کہ ترا زوت یل کنیں من گوشتگ کہ تئی تہ ءَ انچو ھمت نیست کہ مناں دزگیر بہ کنے انچو ھمت ھم نیست کہ یل بہ کنے کمو دور پنجاپی آئی ایس آئی والائے اشتاتگ ات من گشت آ پنجاپی اگاں ترا بگوشیت تو ھمائی ھکم گرے تو آئی ءِ گلام جوڈ بوتگے – من ھمے گشت کہ شما لھتے زرا پگار ءَ وتی وتن ءُ درسانی سودا کتگ – گلامی زند انت پہ جوش گوازینے –

آئی ءَ گوشتگ کہ ما اے ملک ھاکماں تچکی ءَ گوش ایں مروچی ھم شمے گور ءَ موہ ھست، مروچی شما مئے راہ داشتگ بہ دار ات، وتی شوک ءَ سرجم بہ کنے بلے من نوں سرپد بوتگاں کہ شمے گور ءَ آیگ ءَ مناں کجام درونتانی لوٹ انت – پدا چوش مہ بیت کہ شما ادا سجدہ ءَ بہ کپ ئے ءُ ما شمے سر ءَ بہ بہ ایں – ادے چیف آرمی اسٹاف، ڈی آئی جی، کور کمانڈر اے گپ ءَ شری ءَ گوشبداریت آ بلوچستان انت یا خیبر پختونخواہ ءَ ھر کجا انت اگاں ھمے وڈ بوت ھنو ھنچوش ئے گڈا پشتون نوں گیشتر گوں شما وھد گوازینت نہ کن انت – شمارا اگاں اے سرڈگارے سر ءَ ریاست ءِ نزام چلائینگی انت گڈا انساپ گوم ءَ ـ اے وڈ نہ بیت کہ پشتون ءَ یک پنجاپی کور کمانڈرے ءُ بلوچستان ءَ دگہ کور کمانڈرے بہ دارے ءُ سرجمیں نزام ھماھانی دست ءَ بہ بیت – ما گلامیں ما ھچ وڈ اشی ءَ نہ منیں – تو گوستانک ءَ بہ چار ما تچکی ءَ گوشیں پرنگ اتکگ مئے سرڈگارے سر ءَ مزن مزنیں تاکتاں اتکگ ءُ اے سرڈگارے سر ءَ کبزہ کتگ بلے ھمایاں بہ چارے کہ مروچی مئے سرڈگار ءَ چہ دور ءَ بدیں نگاہ ءَ نہ چار انت –

پی ٹی ایم ءِ سرکماش ءَ گوشتگ کہ مار ءَ مجبور کنگ مہ بیت کہ ما دگہ دروشمے ءَ اسلام آباد ءَ بیا ایں، ھر ھما پشتون کہ تو گریوائینتگاں ھماھانی ھون تو ریتکگاں من ءُ منی سنگت کم چہ کم آیانی دیم ءَ بیگیرتیں زند گوازینت نہ کنیں – ما لاچاریں – مار ءَ.لاچار کنگ بوگ ءَ انت بلے اے گپ ءَ شری ءَ گوش بہ دارے اے پہ شما نپ نہ بیت – اے نہ انت کہ شما نپ چست کن یے شمارا سک باز تاوان بیت – اے مئے گڈی رند انت کہ ادا اتکگیں کہ پشتونستان ءَ وتی ناشرکاریاں بند بہ کن – ناشناسیں مردم دگہ کس نہ انت آئی ایس آئی ءُ ایم آئی ءَ انت – اجبیں گپے سرجمیں ملک ءَ ناشناس نیست بس پشتون انت کہ ھما مئے ھک ءِ گپ ءَ جن انت آیاں شھید کن انت –

آئی ءَ گوشتگ کہ ادا ھچ وڈیں ناشناس نیست مارا کنفوژن مہ کن ناکہ وت اے کنفیوژن ءَ بہ بیت کہ ما تئی زلم زور تاکت ءِ دیم ءَ وتی ھک ءِ گپ ءَ نہ جنیں – پہ وتن ءِ ھاتر ءَ مئے سر ھم کربان انت زھرشانی لوٹ کپیت زھرشانی کنیں ءُ تئی گورجیگ ءِ گرگ ٹیم کئیت تئی گورجیگ ءَ ھم گریں –

آئی ءَ گوشتگ کہ اے مچی ءَ بیگواھیں مردمانی کھول اتکگ انت اگاں جرنیل کانود ءُ رھبنداں من انت ھمنکس بیگواھیں مردم ھست انت بلوچ، پشتون، سندھی، دراہ آ میدگس ءَ آرگ بہ بنت پیش کنگ بہ بنت اگاں آکتکار بوت انت آ سزا ءَ ما منیں، اگاں کانوداں نہ من انت مُلایاں من انت ملایانی دیما آرگ بہ بنت، اگاں اے جرنیل رویت ءِ منوکاں ھر ھما دمگاں روایت ھست انت ھمودا آرگ بہ بنت – بلے اگاں اگاں اے جرنیل ناکہ کانود ءَ من انت، ناں اسلام ءَ من انت ءُ ناکہ روایتاں من انت بس زوراکی زان انت گڈا مئے پشتونانی گوستانک ءَ گوش بہ دار ما گوں زوراکاں چون کنیں – بنگالیاں شمے چڑی در کُتگاں بلوچ ءُ پشتون آیانی پوستاں کش انت – مئے باسکاں گوش انت کہ سرینڈر بہ کنے ما جرنیلاں گوشگ لوٹاں کہ اے سرینڈری گوستانک تی انت مئے نہ انت – تو دنیائے دیم ءَ سر جھل کنے ما نہ کنیں ءُ ویڈیو جوڈ نہ کنیں – پشتون پولیس واکداراں گوں دزبندی انت کہ دژمن ھمراہ داری ءَ مہ کنے وتی راج ءِ ھمراہ داری ءَ بہ کنے –