شال ءَ بلوچی ءِ نامداریں گُشندہ ناکو فیض محمد ءِ یات ءَ مراگش

چہ بلوچی میوزک پروموٹرز سوسائٹی ءِ نیمگ ءَ بلوچی زُبان ءِ وش الھانیں گُشندہ ءُ اِزمکار ناکو فیض محمد بلوچ ءِ یات ءَ یک پُر مڑاھیں مراگشے ماں نوری نصیر خان کمپلیکس کوئٹہ ءَ برجم دارگ بُوتگ کہ اے مراگش ءَ زند ءِ ھر تک ءُ پھناتاں سیادی داروکیں مردماں مزنیں کچے ءَ بھر زرتگ –

مراگش ءَ ڈائریکٹر کلچر داؤد ترین، اسحاق خاموش، اسحاق رحیم، پروفیسر ڈاکٹر اے آر داد بلوچ، گلزار گچکی، رمضان نوشروانی، واجہ عبداللہ بلوچ، تاج محمد تاجل ءِ پرزند ءُ ایندگہ پروموٹر سوسائٹی ترانکاراں تران کتگ ءُ ناکو فیض محمد ستک شانی ندر کتگ ءُ گوشتگ کہ ناکو فیض محمد ڈگارزئی نوزدہ سد ءُ یک ءَ ودی بوتگ ءُ شش مئی سال نوزدہ سد ءُ ھشتاد ءُ دو ءَ وپات بوتگ ا بلوچی ءِ ازمکار ءُ گُشندھے بوتگ –

آھانی گوشگ ات کہ ناکو فیض محمد ءَ سرجمیں پاکستانی ءَ بلوچی سوت نوکیں دابے ءَ دیمروئی داتگ انت کہ سرجمیں جھان ءَ آئی ءِ ستا بوتگ –

آئی ءَ بلوچی ءُ فارسی ءَ زھیرونک ءِ ساز پہ دابے جتگ انت – بلوچی گشندھانی تہ ءَ ناکو فیض محمد ءِ بلاھیں نامے کہ آئی ءِ ازم ھر دور ءَ گوشدارگ بیت –

ترانکارانی گوشگ ات کہ یک نیمگے ناکو فیض محمد ءُ دومی نیمگ ءَ مرید بلیدئی ءَ مست توکلی، جام درک، ھانی ءُ شے مرید، ملا فاضل، ملا قاسم، مھناز، گراناز ءُ شھداد ءَ ھوار دگہ گوستانکی شائر زندگ داشتگ انت –

آیانی گوشگ ات ھمیشانی برورد انت کہ مروچی مئے دود تاں ھدے ءَ پھریز ءُ زندگ انت – فیض محمد ءَ بازیں ڈیھاں وتی ازم درانگاز اِتگ ءُ ھر جاہ ءَ وتی ازم ءِ بدولت ءَ نام کٹ اِتگ – نامداریں ازمکار فیض محمد ءِ بازیں سوت عابدہ پروین، محمد علی شیکی، سلیم جاوید پروین خانم ءُ دگہ گُشندھاں وتی توار ءَ گوشتگ انت –

بلوچ میوزج پروموٹر سوسائٹی ءِ ترانکارانی گوشگ ات کہ اے سوسائٹی سال دوھزار ھژدہ ءَ ھمے مولانی ھاتر ءَ جوڈ کتگ کہ بلوچی زبان ءِ ازمکاراں ھما جاہ ءَ سر کنگ تانکہ ازمکار وتی ازم ءِ تہ ءَ شری بیار انت زبان، لبزانک، زیمر، آرٹ ءِ تہ ءَ جوانی آرگ ءُ بلوچی زبان زبان ءِ دیمروئی کار کت بہ کناں –

آیانی گوشگ ات کہ بلوچ میوزک پروموٹر سوسائٹی وتی وس ءَ کار کنگ ءَ انت چریشی زبان دوست اشی ءَ دوست دار انت بلے اژدری گپ اش انت دودربیدگ ءُ زبان ءِ دیمروئی ءَ سرکار وتی زمہ داریاں پیلو بہ کنت –

اے مراگش ءَ بلوچی زبان ءِ نامداریں گشندہ آسمی بلوچ، خالق فرھاد،نوشین قمبرانی،نعیم دلپل، رمضان بلوچ،عارف بُگٹی، کومل زیبی ءُ لیاقت پارکوئی ءَ وتی اِزم ءِ درانگازی کُتگ –

اشی ءَ ابید مراگش ءِ تہ ءَ بلوچی دوچاپی اوں پیش کنگ بُوتگ ءُ کلچرل ڈیپارٹمنٹ ءِ ڈائریکٹر داؤد ترین ءَ سوسائٹی ءِ اے مراگش ساڑات ءُ گُشت پہ سوسائٹی ءِ چشیں سوبمندیں مراگشاں کلچرل ڈیپارٹمنٹ وتی کُمک ءُ ھمراہ داری ءَ برجاہ داریت – اے مراگش ءِ جارچینی ءِ ڈُبّہ اسحاق خاموش ءَ گون بوتگ –