چہ کراچی ءَ یک مردمے زورانسری آوار جنی ءَ پد بیگواہ، چہ شال ءَ یکے یل بوتگ

سربوتگیں ھالانی رِد ءَ گوستگیں روچ ءَ چہ کراچی ءَ پاکستانی پوج ءَ یک مردمے زورانسری آوار جنی ءَ پد بیگواہ کتگ وھدیکہ چہ شال ءَ آوار جنگ بوتگیں یک مردمے یل کنگ بوتگ –

چہ کراچی ءَ آوار جنگ بوتگیں مردمے پجار باکسر شعیب ء غلام علی بابا ءِ نام ءَ بوتگ – اے مرد گوستگیں روچ ءَ پاکستانی پوج ءَ چہ کراچی ءَ بلوچانی ھنکین لیاری سنگو لین ءَ چہ وتی جند ءِ گِس ءَ آوار جتگ ءُ بیگواہ کتگ –

دومی نیمگ ءَ گوستگیں روچاں چہ شال ءَ زورانسری آوار جنگ بوتگیں ھاران ءِ جھمنند ورنائیں نودربر ابرار شاہ یل بوتگ –

زانگ بہ بیت ابرار شاہ ایف ایس سی ءِ نودربرے ءُ اے وھد ءَ آ ماں شال ءَ فری میڈیکل ءِ تیاری ءَ کنگ ءَ بوتگ کہ گوستگیں روچاں شال کواری دگ ءَ زھگانی نادراھجاہ ءِ نزیک ءَ چہ وتی کوٹی پاکستانی پوج ءُ چیریں ادارھانی کارمنداں آوار جتگ ءُ بیگواہ کتگ بوتگ –

زانگ بہ بیت بلوچستان ءِ جتا جتائیں ھند ءُ دمگاں پاکستانی پوج ءِ زوراکی ءُ زورانسری آوار جنیانی درچ یکشل ءَ برجاہ انت وھدیکہ لھتے ماھانی تہ ءَ اشی ءِ تہ ءَ گیشی اتکگ ـ گوستگیں روچاں ماں سندھ ءِ بنجاھی شھر کراچی ءَ بلوچانی زورانسری آوار جنی ءِ تہ ءَ گیشی آرگ ءِ بگیری ءَ بلوچ یکجھتی کمیٹی ءِ نیمگ ءَ دو روچی زھرشانی بنجل ءِ جنگ بوتگ وھدیکہ ماں شال ءَ نمیران ءُ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل ءَ پنچ ھزار ءُ یکسد ءُ چل ءُ دو روچ انت کہ برجاہ انت – گل ءِ کمک سرکماش ماما قدیر بلوچ ءِ رِد ءَ اے وھدی بلوچستان ءِ تہ ءَ ھزارانی کچ ءَ مردم زورانسری آوار جنگ ءُ بیگواہ کنگ بوتگ انت ءُ آھانی تہ ءَ بازینے ءِ ژانگولیں جون ماں ویرانگاں چگل دیگ بوتگ انت، بازینے ماں یکجاھیں کبرانی تہ ءَ کل کتگ انت –