کوھلو: الاج نہ بوگ ءِ سوب ءَ مار ءِ وارتگیں ورنا بیران ، ڈیرہ مراد جمالی ءَ لین گرگ ءَ پنچ مردم بیران

بلوچستان ءِ دمگ کوھلو ءَ مار ءِ ورگ ءَ ورنایے بیران بوتگ وھدیکہ ڈیرہ مراد جمالی ءَ لین ءِ گرگ ءَ جنینے ءَ ھوار پنچ مردم بیران بوتگ انت –

گیشیں ھالانی رِد ءَ لاسیزئی کوھلو ءَ مار ءِ وارتگیں ورنایے کھول ءَ ڈی ایچ کیو نادراھجاہ ءِ دیم ءَ زھرشانی کتگ –

کھول ءِ رِد ءَ کوھلو ءِ ڈی ایچ کیو نادراھجاہ شپ ءَ ڈاکٹر نہ بوتگ ءُ ناکہ انٹی اسنیک ویکسین بوتگ، نادراھجاہ ءِ ایم ایس ءَ وتی زَری کلینک ءِ پچ کتگ ءُ کار ءِ وھد ءَ ایم ایس وتی کلینک ءَ مشگول بوتگ، مار ءِ ویکسین ھم چہ ایم ایس ءِ گِس ءَ آرگ بوتگ –

بیران بوتگیں ورنایے پت ءَ کوھلو ءِ پولیس کارگس ءَ نادراھجاہ ءِ واکدارانی بگیری ءَ ارزی نبشتہ کتگ –

زانگ بہ بیت ھمے سال ءِ مئی ماہ ءَ کوھلو ءِ دمگ کاھان ءَ مار ءِ ورگ ءَ یکیں روچ ءَ شش مردم سانمند بوتگ انت – کوھلو کاھان ءَ ھمک روچ مار ءِ ورگ ءِ ھال آیگ ءَ انت ءُ اشی ءِ تہ ءَ گیشی آیگ ءَ انت بلے پدا ھم سرکاری نادراھجاھاں ویکسین نیست –

دومی نیمگ ءَ چہ بلوچستان ءِ دمگ ڈیرہ مراد جمالی ءَ ھمے ھال آیگ ءَ انت کہ مروچی بزاں آدینگ ءِ روچ ءَ لین ءِ گرگ ءَ جنینے ءَ ھوار پنچ مردم بیران بوتگ انت –

بیران بوتگیں مردمانی تہ ءَ بھرام ء محمد ایوب، عبدالحئی ء عبدالرؤف ءُ آئی لوگبانک ءُ زھگ ھوار اَنت – بیران بوتگیں مردمانی جون نادراھجاہ ءَ برگ بوتگ انت ءُ اودا ھژدری چار ءُ ٹپاس ءَ پد کھول ءِ دست ءَ دیگ بوتگ انت –

وئیل ءِ درگت ءَ ھمے گوشگ بوگ ءَ اِنت کہ ٹرانسپارمر ءِ تار سستگ اَنت ءُ گِس ءِ سر ءَ کپتگ اَنت چہ ایشی ءَ پنچیں مردماں لین ءَ گپتگ ءُ بیران بوتگ انت –