کراچی: زورانسری آوارجنیانی بگیری ءَ دو روچی زھرشانی بنجلے برجم کنگ بیتگ

بلوچستان ءَ ھوار دگہ ھند ءُ دمگاں پاکستانی پوج ءِ زوراکی ءُ زورانسری آوار جنیانی بگیری ءَ کراچی پریس کلب ءِ دیم ءَ دو روچی زھرشانی بنجلے برجم دارگ بوتگ –

اے زھرشانی بنجل بلوچ یکجھتی کمیٹی ءِ نیمگ ءَ مروچی برجم دارگ بوتگ وھدیکہ باندا زھرشانی کنگ ءِ جار ھم جنگ بوتگ –

کراچی زھرشانی ءَ بلوچ یکجھتی کمیٹی ءِ باسکاں ھوار گوستگیں روچاں چہ کراچی ءَ زورانسری آوار جنگ بوتگیں ورنا دادشاہ بلوچ ءِ کھول ھم ھوار بوتگ وھدیکہ درنگاز کنوکانی دست ءَ زورانسری آوار جنگ بوتگیں مردمانی اکس بوتگ انت ءُ آیانی یل کنگ ءِ لوٹ کتگ –

درنگاز کنوکانی گوشگ انت کہ اے زھرشانی بنجل ءِ مول مراد یکبرے پدا بلوچ ورنایانی زورانسری آوار جنی، بلوچستان ءَ برجاھیں ریاستی کریک ڈاؤن ءُ بیگواھیں مردمانی وش ءُ سلامتی کانودی یل کنگ ھاتر ءَ انت – بلوچ یکجھتی کمیٹی زورانسری آوار جنگ بوتگیں مردمانی کھولاں گوں ھمکوپگ انت ءُ مدامی اے ناانساپیانی توار چست کنت –

بنجل ءَ اتکگیں مردمانی گوشگ ات کہ ھمے ماہ ءِ دومی ھپتگ ءَ کساس سِی مردم زورانسری آوار جنگ ءُ بیگواہ کنگ بوتگ انت ءُ ھمک روچ اشی ءِ تہ ءَ گیشی آیان انت – ھمک روچ یک ورنایے پوسٹر جوڈ بوان انت – وھدیکہ ریاست اے درسیں زوراکیانی تہ ءَ سیاسی ءُ پوجی رِد ءَ وتی کرد ءَ پیلو کنان انت ءُ اے زوراکی پاکستان ءِ جوڈ بوگ ءَ بگر تاں روچ مروچی برجاہ انت –

بنجل ءَ اتکگیں چہ کراچی ہاکس بے ءَ پوج ءُ چیریں ادارھانی دست ءَ زورانسری آوار جنگ بوتگیں دادشاہ بلوچ ءِ گھار فوزیہ بلوچ ءِ گوشگ ات کہ یازدہ اگست ءِ شپ ءَ پھازگی لشکر ءَ آئی ءِ گس ءَ بیڑ برتگ ءُ پت ءِ دیم ءَ منی برات زورانسری آوار جتگ ءُ گوں وت برتگ –

فوزیہ بلوچ ءِ رِد ءَ آئی ءِ برات ھم ایندگہ بے گناھیں بلوچ ورنایانی وڈا زورانسری آوار جتگ ءُ مئے کھول ازیت ءِ تہ ءَ کتگ منی برات زوت زاھر کنگ ءُ یل کنگ بہ بیت –

بلوچ یکجھتی کمیٹی کراچی ءَ مروچی بندات بوتگیں زھرشانی بنجل ءَ چہ کراچی ءِ سیاسی ءُ انسانی ھکانی باسکاں گوں لوٹ کتگ ءُ گوشتگ کہ آ بنجل ءَ بیا انت ءُ بیگواھیں مردمانی توار جوڈ بہ بنت –