گوادر ءَ چینی شھریانی ءِ سرءَ بلوچ لبریشن آرمی ءِ اُرشءَ پد شھر ءَ کرفیو برجاہ، بازیں دزگیریانی ھال اِنت۔
13 اگست ءِ سھب ءَ بلوچستان ءِ تیاب دپی شھر سی پیک ءِ ھاترءَ بنجاھی بَندر گوادر ءَ چینی کاروان ءِ سرءَ بلوچ لبریشن آرمی ءِ “مجید برگیڈ” ءِ نیمگ ءَ بیتگیں اُرش ءَ پد پاکستانی لشکریانی نیمگءَ شھر ءِ جتاھیں ھنداں فقیر کالونی، مونڈی ءَ پٹ پولی بیڑ ءِ نیام ءَ بازیں مردم دزگیر کنگ ءَ پد ناشناسیں ھنداں برگ بیتگ اَنت۔
شھر ءِ تہءَ لشکری ءُ پولیس ءِ نیمگ ءَ دگ ءُ راھانی بندش گوستگیں سئے روچاں چہ برجاہ اِنت وھدیکہ جتاھیں ھندانی تہءَ لشکری لوگ پہ لوگ پٹ پولی بیڑ برگ ءَ اَنت۔
اھوالانی ردءَ گوستگیں روچ ءَ چہ گوادر ءَ روکپتی بلوچستان ءَ سیاسی داروکیں پنچ جنین آدم پھازگی واکداراں دزگیر کُتگ ءُ گوں وت برتگ اَنت کہ جُست ءُ پرُس ءَ پد مروچی پولیس ءِ دستءَ دئیگ بیتگ اَنت۔
پولیس ءَ فارن ایکٹ ءِ ارزی نبشتہ کُتگ ءُ جنین آدم آمید گِس ءَ پیش کُتگ اَنت کہ آ رندترءَ بندی جاہ ءَ برگ بنت۔
زانگ بہ بیت کہ گوادر ءَ چینی شرکت ءَ کارکنوکیں چینی شھری پاکستانی پھازگی لشکریانی یک کاروان ءِ یک ترندیں اُرشے تہءَ نشانگ کنگ بیتگ اِت اَنت، اے اُرش ءِ زمہ واری بلوچ لبریشن آرمی ءَ من اتگ اَت ءُ گشتگ اَت اُرش آیانی گل ءِ مجید برگیڈ ءِ نیمگ ءَ کنگ بیتگ۔
بلوچ لبریشن آرمی ءَ اے ارش ءِ تہءَ چار چینی شھری ءُ 11 پاکستانی لشکری کارمندانی کُشگ ءِ زمہ واری من اتگ اَت وھدیکہ گل ءَ چین ءَ 90 روچانی تہءَ بلوچستان ءِ یل کنگ ءِ وھد ھم داتگ۔
مجید برگیڈ ءِ اے ارش ءَ پد شھر ءَ پھازگی لشکریاں ترندیں کچے ءَ پَٹ ءُ پولی بیڑ ءِ بندات کُتگ کہ آ داں انگت برجاہ اِنت وھدیکہ داں انگت بازیں مردم دزگیری ءَ بیگواہ کنگ بیتگ اَنت کہ اشانی تہءَ سئے مردمانی پجار دی بلوچستان پوسٹ ءَ درگپتگ اَت۔