منی برات پوج ءَ درکانودی زورانسری آوار جتگ ءُ بیگواہ کتگ – داد شاہ ءِ گھار

زورانسری آوار جنگ بوتگیں داد شاہ ءِ گھار ءَ کراچی پریس کلب ءَ گوں اھوالکاراں تران کنان ءَ گوشتگ کہ گوستگیں شپ ءِ ادار دو ءِ نزیک ءَ کراچی ہاکس بے ءَ مئے گس ءَ سی ٹی ڈی ءَ مزنیں کچے ءَ بیڑ برتگ ءُ منی ورنا ءُ نودربریں برات داد شاہ ء صبر خان درکانودی آوار جتگ ءُ بیگواہ کرتگ –

آئی ءَ گوشتگ کہ منی برات منی کماشیں پِت ءِ دیم ءَ درکانودی آوار جنگ ءُ بیگواہ کنگ بوتگ، داد شاہ ءِ ھواری ءَ پوج ءَ آئی موبائل، چارجر، سوٹ کیس ءِ تہ ءَ لھتیں گُد زرتگ ءُ گوں وت برتگ انت ءُ پوج ءَ منی پت ءِ دیم ءَ گوشتگ کہ ما سی ٹی ڈی ءِ کارمند ایں داد شاہ ءَ پہ جُست ءُ پُرس ءَ برگ ءَ ایں –

آئی ءَ دیمتر ءَ تران کنان ءَ گوشتگ کہ منی برات یک نودربرے آئی انٹرمیڈیٹ کنگ ءَ پد گِس ءِ مالی جاورانی نگیگ بوگ ءِ سوب ءَ دیم ءَ ونت نہ کرتگ ءُ دکانے پچ کرتگ – ما بنکی ءَ گریشگ ھزدار ءِ جھمنند ایں، اود ءَ جاورانی ناگیگی ءُ پہ وانگ ءَ کراچی ءَ آتکگ ایں کہ ما اد ءَ پہ ایمنی ونت بہ کن ایں اد ءَ کراچی ءَ ایمن بیتگ ایں – منی برات یک شریں انسانے ءُ آئی ءَ بلوچی زبان ءُ لبزانک ءِ بارو ءَ نبشتہ ھم کرتگ، آئی ءِ نبشتگیں کتابے زوت شنگ بیگی بوتگ، چہ ایشی ءَ اَبید آ دگہ ھچ وڑیں گل ءُ کاراں ھوار نہ بوتگ –

آئی ءَ گوشتگ کہ پہ برات ءِ درکانودی آوارجنی ءُ بیگواھی ءِ ارزی دیگ ءَ ما نزیکیں پولیس تھانہ ءَ شتگ ایں، بلے پولیس ءِ کارمستر ءَ سی ٹی ڈی ءِ کارمندانی بگیری ءَ ارزی نبشتہ نہ کرتگ ءُ مارا ھمے گوشتگ کہ آ وتی ادارھانی بگیری ءَ ارزی نبشتہ کرت نہ کن اَنت ءُ مئے ارزی اِش رد کرتگ ، وھدیکہ ما آیان ءَ گوشتگ کہ سی ٹی ڈی ءِ کارمنداں وت منی پِت ءِ دیم ءَ گوشتگ کہ آ سی ٹی ڈی ءِ کارمند اَنت ءُ آ داد شاہ ءَ برگ ءَ انت –

آئی ءَ گوشتگ کہ ما چہ ملکی ادارھانی گوں انساپ ءِ لوٹ ءَ کن ایں، مارا گوشگ بہ بیت کہ ما پہ انساپ ءَ کُج ءَ برو ایں؟ اے ڈیھ ءِ پر ایمنیں شھری ءِ بستار ءَ پوجی کارمند بے میار ءَ بیدے ایپ آئی آر ءَ شپ ءِ نھنگام ءَ اے وڑ ءَ درکانودی آوار جنت ءُ بیگواہ کن انت ءُ بیگواھی ءِ ارزی ھم نبشتہ کنگ نہ بیت ما چوں ءَ انساپ ءِ امیت داشت کنیں ؟

گڈسر ءَ آئی ءَ گوں اھوالکاراں تران کنان ءَ گوشتگ ما چہ اے کانفرنس ءَ ھمے لوٹ ءَ کنیں کہ داد شاہ زوتاں چہ زوت دیم ءَ آرگ بہ بیت ءُ مئے گوم ءَ انساپ کنگ بہ بیت – اگاں داد شاہ ءِ سر ءَ ھر وڈیں بھتامے ھست گڑا ملک ءِ آمیدگس ءَ پیش کنگ بہ بیت ، بلے مارا اے وڑ ءَ درد ءُ رنجانی آماچ کنگ مہ بیت انت – منی کماشیں پِت وتی زھگ ءِ زورانسری آوار جنی ءُ بیگواھی ءِ گماں پریشان اِنت، آئی ءَ ھمنچو گوشگ بہ بیت کہ آئی ءِ زھگ کجام میار ءَ درکانودی آوار جنگ ءُ بیگواہ کنگ بوتگ –