جمیل مھراب ءِ کتاب “ھورکیں زندمان چاپ ءُ شنگ بوتگ

بلوچی زبان ءِ ندکار جمیل مھراب ءِ آزمانکانی کتاب “ھورکیں زندمان ” چہ ملا اسمائیل لبزانکی گل پُل آباد ءِ نیمگ ءَ چاپ ءُ شنگ بوتگ –

ھورکیں زندمان جمیل مھراب ءِ اولی آزمانکانی دپتر انت، کہ آئی ءِ سرجمی ءَ یکسد ءُ دوازدہ تاکدیم انت – کتاب ءِ سر تاک جواد واھگ ءَ ءُ آئی ءِ گالسنج ءُ تراشکار بیبگر الھی ایں کتاب انام رزا ءَ ھورتی ءَ گوں ونتگ ءُ پدا چہ ملا اسمائیل لبزانکی گل ءِ نیمگ ءَ چاپ ءُ شنگ کنگ بوتگ –

کتاب ءِ درگت ءَ اصغر بلوچ ءَ وتی ھیال درشان اِتگ ءُ گوشتگ کہ مروچی بلوچ یک انچیں جاورھالے ءَ دوچار اِنت کہ بلوچ راج ءِ لبزانک کالونیل اھد ءَ اِنت۔ ءُ جمیل مھراب ءِ آزمانک کالونیل اھد ءِ مانزمانی ءَ کن اَنت۔ اے ھمے اھد اِنت۔کہ زبان ءِ پھازگ ءِ جھد ءَ بگر داں بلوچ ءِ تب ءُ جیڑہ، جمیل ءِ آزمانکانی سرھال اَنت۔ اے ھمے باریگ اِنت ھمود ءَ کہ راجدپتر نویس، راجدپتر ءَ نبشتہ کت نہ کنت، اھوالکار ھستیں جاوراں نبشتہ کنگ ءَ مَکن کنگ بیت۔ راجی سیاست پہ لس مھلوک ءَ ھرام کنگ بیت۔ رسانکدر ءِ چم کور ءُ للک بُرگ بیت۔ راجی زبان ءُ ربیت لگتمال کنگ بنت، راج ءَ راجدپتری کوراسی ءِ نیمگ ءَ برگ ءِ ھر وڑیں پندل سازگ بنت۔ گڑا اے وڑیں جاورھالاں لبزانک دراھیں زمبلاں وتی بڈ ءَ زور ایت۔

آئی ءَ گوشتگ کہ ھمے رنگ ءَ جمیل ءِ آزمانک ءِ سرھال بلوچ راج ءِ ھستیں جاورھال اَنت۔ بلے اے ایوک ءَ سیاسی نارہ نہ انت، بلکیں آ آزمانک ءِ ازم ءِ ھیالداری ءَ اوں کنت۔ ھمے واستا آئی ءِ آزمانک وانوک ءَ وتی ھمراہ کن اَنت-

ھمے وڈ مجاہد زاھد ءَ کتاب ءِ سر ءَ وتی چمشانک داتگ ءُ گوشتگ کہ کسھی لبزانک ءِ دگنیا یک انچیں پُر لزتیں دگنیا یے کہ بنیادم ءَ ھزاراں کشک ءِ رندگ پرمائیت، ھزاراں میلانی سپر ءَ در کنت۔ مستریں وشی ایش اِنت کہ فکشن مردم ءَ آگھی ءَ واب گندگ پرمائیت، انچیں واب کہ چہ راستی ءَ راستِر ءُ مانادار تِر اَنت۔ من چہ فکشن ءَ دربرگ ءِ ھمراھی ءَ پہ تاھیر گرگ ءَ اوں وان انت۔ پد ءَ لھتے انچیں کسہ بنت کہ آیانی وانگ ءَ کہ مردم بِندات کنت گُڑا آ کسہ ءِ شیِرکینی ءُ ھما بے دروریں مارشت یک دمانے ءَ مردم ءَ اَچ کتاب ءَ دور بوگ ءَ نیل اَنت۔

آئی ءَ گوشتگ کہ بلے بژن کہ اگاں کسے چشیں تاھیر دئیں ساچشت، بلوچی لبزانک ءِ تہ ءَ شوھازگ ءِ جھد ءَ بہ کنت کہ پہ دمانے ءَ وت ءَ ملما کناں گڑا اد ءَ چُشیں ھاسیں ساچشت کم دست کپ ایت، بید ء چہ لھتیں مردمانی نبشتیگیناں۔ پرچاکہ مئے کر ءَ مردماں تھنا آزمانک ءُ گدار ءِ راھبند دربرتگ اَنت، پمیشکا بس کسہ آرگ ءَ اَنت، بلے فکشن ءِ ازم ءِ رد ءَ اینکدر جوان نہ اَنت۔ پد ءَ گپ کیت ءُ ھمود ءَ اوشت ایت کہ فکشن ءِ ساچگ ءِ واستا تھنا فکشن ناں، بلکیں ایشی ءِ ھمراھی ءَ فلسفہ، تبزانتی ءُ ایدگہ دراھیں پڑ ءَ وانگ ءُ وت ءَ تیار کنگی اِنت۔انچشکہ پالو کولو ءَ پہ ”دا الکیمسٹ“ (The Alchemist) ءِ نبیسگ ءِ واستا پُرّیں چاردہ ءَ سال ءَ ارب ءِ چاگرد ءِ درگت ءَ ونتگ، پٹ ءُ پول کُتگ،آیانی تب ءُ مارشتاں گوں وت ءَ دوچار کنائینتگ، نی آ یک گدارے ءِ نبشتہ کنگ ءَ سوبمند بیتگ۔ بلے مئے کر ءَ ھرکس کہ چہ واب ءَ جاہ جنت، نبشتہ ءَ بندات کنت، چُش نہ چار ایت کہ منی زانت ءُ کُتہ کاری ءِ کد چینچک اِنت، یا من اے درگت ءَ چینچو ونتگ ءُ ھوژیار آں، کہ ناگھی کسہ آئی ءَ مہ مرین ایت۔

مجاھد زاہد ءَ گوشتگ کہ بلے وھدیکہ گپ جمیل ءِ کسہ ساچی ءِ ھُنر ءَ سر بیت،تاں من گشاں جمیل بے ھد سوبمند بوتگ، آئی ءِ ساچشتاں من ءَ مدام تاھیر داتگ، مستریں سوب ایش اِنت کہ جمیل وانوکیں مردمے، باریں چونیں چونیں کتاب،چہ کجا کجا پٹ ایت ءُ وان ایت۔ جمیل فکشن ءِ ھمراھی ءَ ایدگہ دراھیں تکاں وان ایت ،آ توری فلسفہ بہ بیت، تبزانتی یا سیاست بہ بنت، یا لبزانک ءِ ایدگہ پِڑ، ھمے جھد ءُ وانگانی برورد اِنت کہ جمیل وتی کار ءَ سوبمند اِنت۔
اے کتاب آئی ءِ آزمانکانی اولی کتاب اِنت، من ءَ ایشانی وانگ بے کساس وش بوتگ، بلے ھرکسی وتی یک جتائیں تبے، ھرکس چیزاں وتی داب ءَ وان ایت ءُ چار ایت، نوں اے آزمانک ایوک ءَ جمیل ءِ نہ انت بلکیں دراھیں ھما مردمانی ئیگ انت کہ آ اے آزمانکانی دگنیا ءَ وتی نگاھاں شانک دے انت ءُ وتی دیدانک ءَ درنگاز کن انت –