گوادر: انڈس نادراھجاھے کاردارانی پگار ءِ کم کنگ ءِ سر ءَ زھرشانی

بلوچستان ءِ تیاب دپی دمگ گوادر ءَ انڈس نادراھجاھے کاردارانی پگار ءِ کم کنگ ءِ سر ءَ زھرشانی کنگ بوتگ –

زھرشانی سوب ءَ او پی ڈی بند بوتگ چریشی ءَ نادراھجاہ ءَ اتکگیں بازیں نادراھے دلسیاہ بوتگ انت – درنگاز کنوکاں چارٹر آف ڈیمانڈے دیم ءَ آؤرتگ –

دمگی مردم ءُ کاردارانی گوشگ انت کہ گوادر ءِ انڈس نادراھجاہ ءَ ھچ وڈیں آسراتی نیست وھدیکہ نوں کاردارانی پگار ھم کم کنگ بوتگ کہ چریشی ءَ نادراھ ءُ مردم سک باز ماژگی ازیت ءِ آماچ انت –

آھانی گوشگ ات کہ دمگی ہیڈکوارٹر ءُ سی پیک ءِ گور ءِ ھار گوادر ءِ درساں مستریں نادراھجاہ انڈس ءَ ھچ وڈیں آسراتی نیست، گوادر ءُ دوریں ھند ءُ دمگانی مردم پہ وتی الاج ءَ انڈس ءُ سول نادراھجاہ ءَ کائنت بلے ادا آھاں ھچ وڈیں آسراتی نہ رسیت –