کیچ: پاکستانی پوج ءَ ورنایے زورانسری آوار جتگ ءُ بیگواہ کتگ

سربوتگیں ھالانی رِد ءَ پاکستانی پوج ءَ چہ کیچ ءِ بنجاھی شھر تربت ءَ یک ورنایے زورانسری آوار جتگ ءُ بیگواہ کتگ –

ھبدہ سالی ورنایے پجار نوشاد ء میاداد بجیر ءِ نام ءَ بوتگ کہ تربت ءِ دمگ آپسر ءِ نندوک انت –

کھول ءِ مردماں آئی ءِ زورانسری آوار جنی ءِ ھبر راست کُتگ ءُ گوشتگ کہ نوشاد گوستگیں ماھے سِی ءُ یک جولائی ءَ بیگاھے ادار شش ءَ ھما وھد ءَ پاکستانی پوج ءَ زورانسری آوار جتگ ءُ بیگواہ کتگ وھدیکہ آ چہ تربت ءِ بازار ءَ دیم پہ گس ءَ آیگ ءَ بوتگ کہ آپسر ءِ پوجی بنجل ءِ نزیک ءَ چیریں ادارھانی کارمنداں آئی ءِ پرپٹ داشتگ ءُ آ گوں وت برتگ –

آئی ءِ کھول ءَ انسان دوست ءُ ھر تک ءُ پھناتاں سیادی داروکیں مردماں گوں لوٹ کتگ ءُ گوشتگ کہ نوشاد ءِ یل کنائینگے ھاتر ءَ وتی توار ءَ چست بہ کن انت گوم ءَ ھمتوار بہ بنت –

زانگ بہ بیت بلوچستان ءَ پاکستانی پوج ءِ زورانسری آوار جنیانی درچ یکشل ءَ برجاھیں انت ءُ لھتے وھد بیت کہ آئی ءِ تہ ءَ گیشی آرگ بوتگ – اے درگت ءَ بیگواھیں مردمانی پانکجنیں گل وائس فار بلوچ مسنگ پرسنز ءِ رھشون ماما قدیر بلوچ ءِ گوشگ انت کہ وھدی سرجمیں بلوچستان ءَ کساس پنجاہ ھزار ءَ گیش مردم زورانسری آوار جنگ ءُ بیگواہ کنگ بوتگ انت کہ آھانی تہ ءَ گیشتریں کچ سیاسی باسک ءُ بلوچ نودربرانی انت –