پنجگور ءُ آواران ءَ پوج ءِ سر ءَ اُرش، کولواہ ءَ پوجی بیڑ

بلوچستان ءِ دمگ پنجگور ءُ آواران ءَ پاکستانی پوج ءِ سر ءَ اُرش ءُ سلاہ بندانی میان ءَ جنگ ءُ چوپ، ھمے وڑ کولواہ ءَ پوج ءَ لشکر کشی بندات کتگ ءُ زالبول ءُ زھگ لٹ ءُ کُٹانی نشانگ کنگ بیتگ اَنت-

اھوالانی رد ءَ پنجگور ءِ دمگ گرمکان ءَ گوستگیں شپ ءَ ناشناسیں مردماں پاکستانی پوج ءِ چیک پوسٹ نشانگ کتگ-

دمگی مردمانی رد ءَ اُرش ءَ پوج ءَ تاوانانی دیمپانی کنگ کپتگ ، بلے داں انگت ءَ پوج ءِ نیمگ ءَ ھچ اھوال دیم ءَ نیتکگ اَنت-

دومی نیمگ ءَ آواران ءُ مشکے ءِ میانی دمگ کنیرہ ءَ مروچی سھب ءَ ترندیں تیرگواری ءُ تراکانی توار اشکنگ بیتگ اَنت-

دمگی مردماں گمان پدر کنان ءَ گوشتگ کہ تراک ءُ تیرگواری پاکستانی پوج ءُ ناشناسیں سلاہ بندیں مردمانی میان ءَ بیتگ –

دومی نیمگ ءَ کولواہ ءَ ھال اِنت پاکستانی پوج ءَ جتا جتائیں ھنداں بیڑ برتگ ءُ زھگ ءُ زالبول لٹ ءُ کُٹانی نشانگ کتگ اَنت ءُ لوگانی گران بھائیں مڈی ءُ موبائل گوں وت برتگ اَنت-