روس ءِ وزیر دفاع ماں گوریچانی کوریا ءَ تر ءُ تاب اود ءَ بیلسٹک میزائلانی مراگش ءَ بھرمند

روس ءِ وزیر دفاع سرگئی شائگو ءَ گوریچانی کوریا ءِ رھشون جونگ اُن ءَ پیانگ یانگ ءَ گند ءُ نند کتگ ایشی ءِ سر ءَ مھمان ءَ ڈیفنس ایکسپو ءِ تر ءُ تاب کتگ اود ءَ بیلسٹک میزائل ایر اَنت-

ھال سر کنوکین روئٹرز ءَ گوریچانی کوریا ءِ سرکاری اھوالانی درور دیان ءَ گوشتگ کہ ھردوک ڈیھانی سیادی ءِ گھتر کنگ ءِ سر ءَ گپ بیتگ اَنت-

وزیر دفاع شائگو ءَ روس ءِ سروک ولادیمیر پوتن ءِ نمدی ھم کم جونگ اُن ءَ سر کتگ- پسو ءَ گوریچانی کوریا ءِ رھشون ءَ روس ءِ سروک ءِ منت گپتگ اَنت ءُ پوجی باسکانی آیگ ماں ڈیھ ءَ وش اتک کتگ اَنت –

آئی ءَ گوشتگ گند ءُ نند ءَ ھردوکیں ڈیھانی میان ءَ اسٹریٹیجک ءُ دودمانی سیادی ءِ توک ءَ گیش گھتری کیت اِنت-

روس ءِ باسک ءُ چین ءِ گچین چینی کمیونسٹ پاٹی ءِ پولٹ بیورو ءِ باسک لی ھونگ ژونگ ھمے ھپتگ ءَ گوریچانی کوریا ءَ سر بیتگ ءُ اود ءَ کوریا جنگ ءِ ھلاس کنگ ءَ ھپتادمی سالگشت ءَ گوریچانی کوریا ءَ یوم فتح ءِ روچ داشتگ اَت-

اے میان اُستمانی نادراھی کورونا ءَ پد اے اولی رند ءَ مزنیں باسکانی آیگ گوریچانی کوریا ءَ گندگ بوگ ءَ اَنت-

اے باسک ھنچیں وھدے ءَ اتگ اَنت کہ پیانگ یانگ ھمود ءَ اِنت ءُ وھدیکہ گوریچانی کوریا ءِ سرکار روس ءأ چین ءَ وتی سیادی ءِ دارگ ءُ مھکم کنگ ءِ جھد ءَ اِنت ءُ وتی بگیردار واشنگٹن ءِ درگت ءَ ھواریں راھے ءِ شوھاز ءَ اَنت-

گوریچانی کوریا ءِ ھال سرکنوکیں ایجنسی ءِ رد ءَ کم جونگ اُن ےَ شائیگو ءِ چیردستی ءَ آیوکیں روس ءِ باسک دفاعی نمائشانی تر ءُ تاب کتگ کہ ھما جنگ ءِ سالگشت ءَ دارگ بیتگ اَنت کہ اود ءَ نوکین پوجی ساز ءُ سامان ءُ سلاہ ایر کنگ بیتگ اَنت-

درشان ءِ رد ءَ کم جونگ اُن ءَ روس ءِ وزیر دفاع ءَ دنیا ءَ نوکیں سلاھانی جوڑ کنگ ءِ ٹرینڈ ءُ آئی ءِ اسٹریٹیجی ءِ درگت ءَ وتی ھیال درشان کتگ اَنت-