قران پاک ءِ سوچگ ءِ ھلاپ ءَ زھرشانی، بغداد ءَ سویڈن ءِ سپارتھانہ ماندارگ بیتگ

عراق ءِ بنجاھی شھر بغداد ءَ سدانی کچ ءَ ھواریں زھرشانی کنوکاں سویڈن ءِ سپارتھانہ ءِ سر ءَ اُرش کتگ ءُ ماڑی آس داتگ-

ھال سر کنوکیں ادارہ روئٹرز ءِ رد ءَ پاک تاک ءِ سوچگ ءِ ھلاپ ءَ یک دگہ لگتمالی ءَ عراق ءَ سویڈن ءِ سپارتھانہ ءِ دیم ءَ زھرشانی بیتگ – پشمبے ءِ سھب ءَ سدانی کچ ءَ زھرشانی کنوک سپارتھانہ ءِ تہ ءَ پترتگ اَنت ءُ ماڑی اش مانداشتگ-

وئیل ءَ پد سویڈن ءِ وزارت ءِ ھارجہ ءَ یک درشانے ءَ وئیل ایر جتگ – اسٹاک ھوم ءَ وزارت ھارجہ ءَ شنگ کتگیں درشان ءِ رد ءَ ما سپارتکار ءُ میان اُستمانی گلانی ھر تکانی اُرشاں ایر جن ایں –

بغداد ءَ سویڈن ءِ سپارتھانہ ءَ اے درگت ءَ دگہ گپانی پسھی نہ داتگ-

پشمبے ءِ اے زھرشانی ءِ جار شیعہ مزھبی رھشون مقتدیٰ الصدر ءَ کتگ، چاگردی ترامجاہ ٹیلی گرام ءَ پوسٹ کنان ءَ گوشگ بیتگ کہ مقتدی ءِ منوکانی زھرشانی کنگ ءَ پد آیانی دیم سویڈن ءِ سپارتھانہ ءِ نیمگ ءَ بیتگ –

ایشی ءَ پیش ھم ھال اتکگ اسٹاک ھوم ءَ پولیس ءَ عراقی سپارتھانہ ءِ ڈن ءَ پاک تاک ءِ سوچگ ءِ ھلاپ ءَ زھرشانی ءِ منگ نامہ داتگ-