وڈھ: دو نیمگی سنگر کرتگیں ھردوکیں نیمگاں مزنیں سلاہ کامرد کنگ ءَ اَنت

ھزدار ءِ دمگ وڈھ ءَ دو نیمگی داواداراں بازیں ادارھاں تیرگواری کتگ، دمگ ءَ ترس ءُ بیم ودی بیتگ-

وڈھ ءَ دو نیمگی داوادارانی نیمگ ءَ برجم کرتگیں سنگراں تیرگواری کنگ بیتگ- ھردوکیں نیمگاں مزنیں سلاہ کارمرد بیتگ اَنت-

چریشی ءَ چہ دمگ ءَ ترس ءُ بیم.ودی بیتگ اَنت- بازار سرجم ءَ بند کنگ بیتگ ءُ شھری لوگاں ڈن درکپگ ءَ نہ اَنت-

زانگ بہ بیت ھردوکیں داوادارانی نیمگ ءَ چہ گوستگیں شپ ءَ تیرگواری ءِ درچ برجاہ بیتگ اَنت کہ مروچی اے تیرگواری گیش بوتگ-

بلوچستان نیشنل پاٹی ءُ سردار اختر مینگل ءِ منوکانی گپ اِنت کہ شفیق مینگل ءَ ریاستی ادارھانی چیردستی گون اِنت ءُ وڈھ ءِ جاوراں ناگیگ کنگ لوٹ ایت-

نیشنل پاٹی ءَ کوٹ مینگل ءِ سر ءَ اُرش ءِ ھلاپ ءَ سرجمیں بلوچستان ءَ زھرشانی کنگ ءِ جار جتگ ءُ شھدگ بند کتگ اَنت – بلوچستان ءِ باپاری شھر ھب چوکی ءَ کراچی ءُ شال ءِ مزن شھدگ روانی ءِ واستا بند کتگ-

شال ءِ مزن شھدگ ءُ دگہ دمگاں ھم بی این پی ءِ باسکاں زھرشانی دروشم ءُ دگ بند کتگ اَنت-

بلے داں سر بیتگیں اھوالانی تہ ءَ گوشگ بیتگ کہ ھردوکیں نیمگاں تیرگواری ءِ درچ بند بیتگ اَنت-