شال ءَ زورانسری آوار جنیانی بگیری ءَ زھرشانی برجاہ

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل ماما قدیر بلوچ ءِ سروکی ءَ ماں شال پریس کلب ءِ دیم ءَ برجاہ، زھرشانی بنجل ءَ مروچی پنچ ھزار ءُ یکسد ءُ نُھ روچ سرجم بوتگ انت –

مروچی بی ایس او پجار ءِ بنجاھی سرکماش بوھیر صالح، ھنکینی سرکماش شکور بلوچ، سی سی باسک سید قمبر ، حین شاہ، شعیب بلوچ ءُ دگہ مردماں اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

گل ءِ کمک سرکماش ماما قدیر بلوچ ءَ گوشتگ کہ بلوچستان ءَ بلوچانی زورانسری آوار جنی ءَ ھوار درسیں انسانی ھکانی لگتمالی دارگ بہ بیت –

آئی ءَ گوشتگ کہ پاکستان پرایمنیں زھرشانی ءُ انسانی ھکانی رھبنداں لگتمال کنان ءَ بلوچ ءِ چکچینی ءَ کنگ ءَ انت –

آئی ءَ گوشتگ کہ پاکستانی پوج ءِ زوراکیانی درورے گوستگیں روچاں ڈیرہ بگٹی، نصیر آباد ءَ گندگ بوتگ وھدیکہ بولان، تربت، آواران، مشکے ءَ پوج ءَ بلوچانی سر ءَ لشکر کشی بندات کتگ ءُ بازیں مردمے زورانسری آوار جتگ انت –

ماما قدیر ءَ گوشتگ کہ اے وھدی بلوچستان یک جنگ زدگ دمگ ءِ جوڈ بوتگ بلوچ وتی انسانی ھکانی بگیری ءَ پرایمنیں جھد کنگ ءَ انت ءُ ریاستی پوج آھانی توار ءِ ایرموش کنگ ءِ ھاتر ءَ آھانی سر ءَ وڈ وڈیں زلم زوراکی کنگ ءَ انت –