آواران، ڈیرہ بگٹی ءُ کیچ ءَ پوج ءِ لشکر کشی برجاہ،ھشت کس بیگواہ

بلوچستان ءِ دو جتا جتائیں جاہ آوار ءُ ڈیرہ بگٹی ءَ گوستگیں بازیں روچاں چہ لشکر کشی برجاہ، لشکر کشی ءَ پوج ءَ داں انگت ءَ بازیں مردم آوار جتگ ءُ بیگواہ کتگ اَنت کہ ایشانی توک ءَ شش کسانی پجار بیتگ اَنت-

ڈیرہ بگٹی ءِ دمگ سوئی ءَ گوستگیں بیست ءُ چار ادارانی توک ءَ پاکستانی پوج ءَ بیڑ بران ءَ بازیں مردمے دزگیر کنگ ءَ پد بیگواہ کتگ اَنت کہ ایشانی توک ءَ سَے کسانی پجار بیتگ اَنت-

آوار جنگ بیتگیں مردمانی پجار سواگل ء پنھل بگٹی، ھسینو ء بکتیار بگٹی ءُ دادن ء شے ھان بگٹی ءِ ناماں زانگ بیتگ اَنت –

بیگواہ کنگ بیتگیں مردمانی تہ ءَ دادن لیویز لشکر ءِ ملازمے کہ آ پوج ءَ سوئی ءِ چھاونی ءَ لوٹائینتگ ءُ بیگواہ کتگ –

زانگ بہ بیت دادن ءِ پت شَے ھان بگٹی بیست ءُ سَے جون دوھزار ءُ سیزدہ ءَ پاکستانی پوج ءَ مٹ ءِ ھند ءَ شش دگہ مردمانی ھواری ءَ آوار جتگ ءُ پد ءَ درست کشتگ ءُ چگل داتگ اَنت-

دادن ءِ کھول ءِ گوشگ اِنت کہ آیانی زھگ لیویز ءِ ملازم اِنت ءُ ھمے آیانی لوگ ءِ والینوک اِنت ءُ آئی ءِ زند ءِ واستا ترس اِنت ءُ واکداراں آئی ءِ یل کنگ ءِ لوٹ اِنت-

زانگ بہ بیت ڈیرہ بگٹی ءَ چہ بازیں روچاں پاکستانی پوج ءِ لشکر کشی برجاہ اِنت ءُ اھوالانی تہ ءَ گوشگ بیتگ کہ لشکر کشی ءِ وھد ءَ پوج ءَ بازیں کچے ءَ مردم دزگیر کتگ ءُ بیگواہ کتگ اَنت-

دومی نیمگ ءَ آواران ءَ ھم پاکستانی پوج ءِ لشکر کشی برجاہ اِنت ءُ بازیں روچاں آواران ءِ دمگ زیارت ڈن، کچ، گلامو بازار، گرائی، لوپ، ابراھیم بازار ءُ زیلگ ءَ لشکر کشی برجاہ اَنت-

آواران ءَ پوج ءَ لشکر کشی ءِ وھد ءَ بازیں مردم آوار جتگ اَنت کہ آیانی توک ءَ داں انگت ءَ سَے مردمانی پجار بیتگ اَنت زاھد ء دلبود، واھد ء کریم بکش ءُ امداد ء ابراھیم ءِ ناماں زانگ بیتگ اَنت-

ھمے وڑ ءَ کیچ ءِ دمگ تمپ بوستان پاکستانی پوج ءَ بیڑ برتگ ءُ دو مردم آوار جتگ اَنت-

آوار جنگ بیتگیں مردمانی پجار پیر بکش ء بیت اللہ ءُ فاروق ء مراد ءِ ناماں زانگ بیتگ اَنت-