ھزدار شھدربرجاہ ءَ نودربرانی زھرشانی برجاہ

نودربراں وتی لوٹانی ھک ءَ چکاس ماٹو کُتگ ءُ نندانک ءَ نشتگ انت –

بلوچستان یونیورسٹی آف انجنئرنگ اینڈ ٹیکنالوجی ھزدار ءَ کنٹرولر چکاسانی درگت ءَ نودربر ءُ واکدارانی میان ءَ بوتگیں گند ءُ نند ءَ نودربرانی لوٹانی سر ءَ گامگیج نہ زورگ ءِ بگیری ءَ مروچی ھم زھرشانی برجاہ بوتگ –

ھزدار شھدربرجاہ ءِ نودربراں مروچی پنچ روچ انت کہ زھرشانی ءَ نشتگ انت –

بلوچستان شھدربرجاہ انجینئرنگ ءُ ٹیکنالوجی ھزدار ءِ واکداراں زھرشانی ءِ اولی روچ ءَ نودربرانی درگان درگان کنگ ءِ ھاتر ءَ ایف سی لوٹارینتگ وھدیکہ ھمے میان ءَ پولیس شھدربرجاھے تہ ءَ پُترتگ ءُ نودربر لٹ شاپ کتگ انت دزگیر کنگ بوتگیں نودربر دومی روچ ءَ یل داتگ انت –

نودربرانی رِد ءَ پولیس ءِ دست ءَ دزگیر کنگ بوتگیں نودربر لٹ شاپ کنگ بوتگ انت واکداراں گوں وتی انا ءَ زانشتی ادارہ تباہ کتگ وائس چانسلر ءُ ایڈمن ھم اے جاوراں ھچ گوشگ ءَ نہ انت لوتانی منگ وتی جاہ ءَ نوں نودربراں شھدربرجاہ ءِ پُترگ ءَ نیلگ ءَ انت –

زانگ بہ بیت بلوچستان شھدربرجاہ ءَ گوستگیں پنچ روچ انت کہ نودربر زھرشانی کنگ ءَ انت آھانی لوٹ ھمیش انت کہ زر کم گرگ بہ بیت، شھدربر جاہ ءِ بازین جاھاں وسریں کیمرہ جنگ، اسکالر شپ دیگ، شھدربرجاہ ءِ تہ ءَ وانگی سرکلانی بندش ھلاس کنگ ءَ ھوار چکاس گروک ءِ مٹینگے لوٹ ھوار انت کہ واکداراں کنٹرولر ءِ در کنگ کنگ ءُ نودربرانی ایندگہ لوٹانی منگے کول کُتگ بوتگ –

نودربرانی گوشگ ات کہ واکدار وتی کولانی پاسداری ءَ بہ کن انت اگاں ناں نودربر ھمے داب ءَ وتی زھرشانی ءَ برجاہ دار انت –