بلوچستان ءِ دمگ آواران ءَ پوجی بیڑ برجاہ اِنت، وھدیکہ آواران ءُ شال ءَ چہ سربیتگیں ھالانی ردءَ پاکستانی لشکریاں چار مردم زورانسری بیگواہ کُتگ اَنت۔
سر بیتگیں اھوالانی ردءَ گوستگیں روچءَ پاکستانی لشکریاں آواران ءِ ھنکین لباچ زیارت ڈن ءَ بیڑ بُرتگ ءُ سئے مردم دزگیر کُتگ اَنت۔ وھدیکہ مروچی سھب سرءَ پاکستانی لشکریاں آواران ءِ ھند پیرندر زیلگ انگر کُتگ ءُ بیڑ بندات کُتگ۔
گُڈسری اھوالانی ردءَلشکریانی مزنیں کساس ءِ ھمے دمگانی تہءَ ساڑی اِنت، وھدیکہ لوگ پہ لوگ پٹ پول برجاہ اِنت۔ البت مروچی برجاہیں بیڑءِ نیام ءَ ھچ پئیمیں دزگیری ءُ بیرانی ءِ ھال دیما نئیتکگ۔
گوستگیں روچاں چہ آواران ءَ بیگواہ بیتگیں مردمانی پجار کماش دینار، زباد ء سخی داد ءُ داد بخش ء علی محمد ءِ ناماں چہ بیتگ۔
اھوالکارانی گُشگ اِنت کہ بیگواہ بیتگیں دراسکی ءِ جھمنند اَنت کہ اے لشکریاں پہ زور چہ آودہ لڈگ ءَ لاچار کُتگ بیتگ اَنت ءُ آ اے وھدءَ اِدءَ زند گوازینگ ءَ بیتگ اَنت کہ گوستگیں روچءَ پاکستانی لشکریاں بیڑ بُرتگ ءُ دزگیری ءَ پد زورانسری بیگواہ کُتگ اَنت۔
زانگ بہ بیت کہ بیگواہ بیتگیں کماش دینار چریشی ءَ پیسر یازدہ فروری 2020 ءَ شپ ءِ نیم ءَ چہ آواران ءِ ھنکین تیرتیج ءَ بیڑ برگ ءُ آئی دو بچ محمد علی ءُ واحد ءَ ھوار دزگیر کنگ بیتگ اَت، کہ آیانی تہءَ علی محمد دزگیری ءِ نیام ءَ لشکریاں کُشتگ اَت۔
ھمے ھانوادءَ سیادی داروکیں نصیر ء بائیان ءِ جون توتک ءِ ھواریں دمباں چہ دزکپتگ اَت، کہ آ 2013 ءَ پاکستانی چیریں ادارگانی کارندھاں دزگیر کُتگ بیتگ۔
دومی نیمگ ءَ بیگواھیں بلوچانی یل کنائنگ ءَ پہ کار کنوکیں گل وائس فار بلوچ مسنگ پرسنز ءِ گُشگ اِنت کہ چہ شال ءَ آواران ءِ جھمنندیں نودربر اعظم ء اللہ داد پاکستانی لشکریاں گیر قانودی ردءَ دزگیر کنگ ءَ پد بیگواہ کُتگ۔