اگاں جنگ مہ بیت؟
نبشتہ کار: سگار بلوچ
دی بلوچستان پوسٹ
دانکہ یک گُلامیں سرزمین ءِ سر ءَ جنگ نہ مانیت گُڑا آ راج پہ وت ھچبر وشیں واب نہ گند ایت۔ جنگاں راج ءُ راجانی گوستانک، دود ءُ ربیدگ ءُ زبان زندگ کُتگ اَنت۔ گُلامی ءُ بزگی ءِ سانکلانی پروش دیگ پہ جُھد پہ جنگ ءُ پہ گھگیری بیت۔ دُنیا ءِ تہ ءَ ھزاراں راج بوتگ اَنت کہ مرچی آھانی راجی پجار ھلاس بوتگ انت۔ مرچی آیانی راج دپتر، دود ءُ ربیدگ ءُ زُبان گار ءُ گور اَنت۔ گُلامیں سرزمینانی سرا ژانگولیں جون، سِلکاری، ءُ مرُدمانی گارءُ بیگوائی چہ زورگر ئے نیمگ ءَ ھمُک روچ بنت۔ بلے ھمے جاوراں مھلوک را سکین داتگ کہ آ پہ وتی وت واجھی ءَ جنگ بکن انت ءُ مرچی ھما راج گندگ باں کہ آیاں پہ وتی وت واجھی ءَ جنگ کُتگ ءُ یک زُرمبشت ءِ آرتگ۔
بلوچ سرزمین ھم یک جنگ آماچیں ڈگارے کہ اُودا پہ یک زوراکے ئے ھلاپ ءَ جنگ برجا اِنت ءُ اے جنگ ءِ برورد اَنت کہ مرچی یک بلوچ ءِ پہ شان وتی زُبان ءُ دودمانانی سرا پَھر بند ایت ءُ پہ مڑایے گُش ایت من بلوچے آں۔ اگان اے جنگ مہ بوتیں انچو کہ بلوچ مال ءُ مڈی زوراک ءِ لاپ ءَ اَنت انچو راج دپتر ، دود ءُ ربیدگ ءُ زبان ھم آئی ءَ گار ءُ گور کُتگ اتاں۔ اے جنگ ءِ برورد اِنت کہ مرچی بلوچ سرزمین مانیت ءُ پہ آئی ءَ یک آشوبے مانیت۔
اگاں ما میان اُستمانی آشوباں بچاراں گُڑا ابید جنگ ءَ ھچ چوشیں راھے نہ بوتگ کہ آیاں پہ وتی وتواجھی ءَ کُتگ، ھمک ھما راجاں کہ جنگ ءَ پروش وارتگ یا وتی جنگ نیم رایاں یلہ داتگ گُڑا آ راجانی نام ءُ نشان مرچی زمین ءِ سرا زاھر نہ بنت، اگاں پہ درور مہ بچاریں، ویتنام، ہندوستان، کیوبا، الجزائر، اسرائیل، چائینا، افریکہ، ءُ دگہ سدانی کچاں انچیں مُلک بُوتگاں کہ آیاں پہ وتی راجی آجوئ ءَ جنگ کُتگ ءُ مرچی وتئ زمین، زُبان، دود ءُ ربیدگ ءُ راج دپتر ءِ سر ءَ پَھر بند اَنت۔
اے گپ ءِ تہ ءَ ھِچ دروگ نیست کہ جنگ کُشت ءُ کوش، در پہ دری، بے لوگی ءُ تبائی ءِ نام نہ اِنت بلے اے ھم جنگ اِنت کہ ھمے گُلامی ءِ سانکلاں پروشیت ءُ آجوئی ءِ دراں پچ کنت، ابید کُشت ءُ کوش ءَ ابید بزگی ءَ ھِچ راج وتئی راجی آجوئی ءَ گپت نہ کنت ءُ ناں چہ زوراک ءَ رکیت کنت۔
کجامی زورگِر وھدے یک راجے زیردست کنت گُڑا آ راج ءَ ھمے باور کناھینت کہ منی واجھی ءَ بہ منیت ءُ آ راج ءِ تہ ءَ وتئی نوک آبادیاتی ربیت ءَ رواج دنت۔
ھمے وڑا وھدے ھما زیردستیں راج وتئی راجی گُلامی ءِ مارشت ءُ مرت ءَ زانت گُڑا آھودا راجی زرمبشت چست بنت۔ ھمے راجی زرمشت ءُ جُنز ءِ بار ءَ آ راج ءِ ورنا، پیر ءُ کماش ءُ زالبول وتئی کوپگ ءَ زور انت ءُ کُربانی دھینت۔ مرچی بلوچ راج ھم ھمے جاورانی دیمپان اِنت یک نیمگے زورگر ئے زوراکی انت ءُ دومی نیمگ ءَ بلوچ ورناھانی داتگیں دیمونی ءُ ریتکگیں ھونانی کاروان انت کہ دیم پہ منزل جُنزان اِنت۔
اے جنگ بلوچ ءِ راجی ھستانکی ءُ پجار ءِ جنگ اِنت اے جنگ بلوچ ءِ دودمان ءُ زبان ءِ جنگ انت۔ اگاں زندگ بوگ لوٹ ئے ءُ بلوچے بوگ لوٹ ئے گُڑا اے جنگ ءَ الم بھر بزور ءُ اے جنگ ءَ دیم ءَ بر چی ءَ کہ اگاں اے جنگ مہ بیت گُڑا پہ بلوچ ءَ ھچی نہ مانیت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔