کے ءَ را پرواہ اِنت، کے گمیگ اِنت؟
شائر : ھاتر اسلم
بچ شُت اَنت ورنائیں
گھار رَپت اَنت شارلیں
کے ءَ را پَرواہ اِنت؟
کے گمیگ اِنت؟
دو چُک ءِ مات
پرچا لاچار بیت؟
کے پھم اِیت درد ءَ باتن ءِ؟
برات ءُ گھار بیگواہ
چُک پِٹے آپ ءَ گمیگ
کماش چُنڈے نان ءِ مھتاج
پِت دُود ءُ دَر چہ ڈیھ ءَ
اِزّت ءُ ننگ گوں ھاکاں ھوار
کے ءَ را پَرواہ اِنت؟
کے گمیگ اِنت؟
سورمگیں کوہ سنگر اَنت مرچاں
میتگ ءُ بازار ھبتک ءُ ویران
کوہ ءُ گٹانی ندارگ
نند ءُ نیاد کماشانی
رپتگ اَنت دوست ءُ ھمدلیں یار
کے ءَ را پَرواہ اِنت؟
کے گمیگ اِنت؟
شِھزاد ءَ مار اِت بزگی
اھسان ءَ رتکگیں ارس ماتانی
شابیز گمیگ اَت پہ راج ءَ
تسلیم پہ گیرات ءُ نگ ءَ
ریھان چہ ساہ ءَ سَرگْوست
کے ءَ را پَرواہ اِنت؟
کے گمیگ اِنت؟
کے مَرگ لوٹ اِیت؟
کے بیزار چہ زند ءَ؟
بس بیوسی ءُ بزگی
تنگدستی راج ءِ
گلامی لاچار کنت
کے ءَ را پرواہ اِنت؟
کے گمیگ اِنت؟
بس جُست ءُ لوٹ بیت
اے چونیں کاروانے؟
واننداہ ءُ زانتکار، شائر ءُ تبیب
استاد، ….
شپانک اوں گوں اَنت
آبتاب چی ءَ گون اَت گوں؟
سَربُلند پرچا کارستے اَت؟
سمو چی ءَ پدائی بوت
ھمک جست ءِ پسّو ءَ واجہ
چک ءِ بیوابیں چم
کماش ءِ مھتاجی
پت ءِ درانڈھی
برات ءِ بیگواھی
مات ءِ ودار
ھیات ءِ ھون
برمشل ءِ گریوگ
شارُل ءِ کُربانی
تابش ءِ شائری
بَانُک ءِ دانک
ساجد ءِ نبشتانک
ورناھانی جون
بلوچ ءِ زندمان
چو کوہ ء البُرز ءَ تئی دیم ءَ مِک کنت