کلات: بیگواھیں مردمانی یل نہ کنگ ءِ بگیری ءَ زھرشانی، کراچی تاں شال ءِ شھدگ بند

بلوچستان ءِ دمگ کلات منگچر ءَ بیگواھیں نوید لانگو، شاہان بلوچ، قذافی نیچاری، کفایت نچاری ءُ محمد حسن ءِ کھولاں وتی دوستگیں مردمانی زورانسری آوار جنی ءِ بگیری ءَ زھرشانی کنان ءَ کراچی تاں شال ءَ رؤکیں شھدگ ءِ سر ءَ نندانک جتگ ءُ شھدگ سرجمی ءَ بند کتگ –

کھول ءِ نیمگ ءَ دگ سھب ءِ ادار ھپت ءِ نزیک ءَ بند کنگ بوتگ، زھرشانی میان ءَ بیگواھیں نوید ءِ گھار ءَ گوں اھوالکاراں تران کنان ءَ گوشتگ کہ نوید احمد لانگو سال دوھزار پانزدہ ءِ پانزدہ اپریل ءَ چہ منگچر ءِ بازار ءَ پوجی کارمنداں آوار جتگ ءُ گوں وت برتگ کہ ھما انت آئی ءِ ھچ ھال اھوال نیست –

آئی ءَ گوشتگ کہ درسیں بیگواھیں مردم یل کنگ بہ بنت یا آمیدگس ءَ آرگ بہ بنت تانکہ ما اے درد ءُ ازیت ءَ رکیت بہ کن ایں –

آئی ءِ گوشگ ات کہ اگاں مئے دوستگیں مردم آمیدگس ءَ آرگ نہ بنت گڈا کم چہ کم مارا آھانی درگت ءَ سرپدی دیگ بہ بیت ءُ مارا مئے دوستگیں مردمانی گوم ءَ ھال ءُ اھوال کنائینگ بہ بیت تانکہ مئے دل ءَ تسلہ ءِ بہ رسیت –

زھرشانی ءِ میان ءَ بیگواھیں شاہان بلوچ ءِ زھگ ءَ تران کنان ءَ گوشتگ کہ منی پت گوستگیں سال دوھزار بیست ءُ دو ءِ پوجی کارمنداں آوار جتگ ءُ بیگواہ کتگ –

آئی ءِ گوشگ ات کہ منی وتی پت ءِ یل.کنائینگے ھاتر ءَ باز براں زھرشانی کتگ در پہ در بوتگ انت بلے ھچ نہ رستگ –

آئی ءَ گوشتگ کہ منی پت ءَ ھوار درسیں بیگواھیں مردم یل کنگ ءُ آمیدگس ءَ آرگ بہ بنت یا مئے دوستگیں مردمانی گوم ءَ ھال اھوال کنائینگ بہ بیت تانکہ مارا تسلی بہ رسیت –

زانگ بہ بیت دو ماہ ساری بیست ءُ یک مئی دوھزار ءُ بیست ءُ سَے ءَ ھم نوید لانگو، شاہان بلوچ، قذافی نیچاری، کفایت نچاری ءُ محمد حسن ءَ ھوار ایندگہ بیگواھیں مردمانی ھاتر ءَ آھانی کھولانی نیمگ ءَ زھرشانی کنگ بوتگ ات کہ سرکاری مردماں آ باور کنائینگ بوتگ انت بلے آئی ءِ سر ءَ روچ مروچی گامگیج زورگ نہ بوتگ –