بلوچستان: شال ءُ لورلائی ءَ تیرگواری ءِ وئیل ءَ پِت ءُ چکے ءَ ھوار سَے مردم بیران ، کوش ءِ بگیری ءَ زھرشانی

سربوتگیں ھالانی رِد ءَ بلوچستان ءِ بنجاھی شھر شال ءَ دُزانی تیرگواری ءَ پت گوں ھمراھے چُک ءَ بیران بوتگ انت ، وئیل ءِ بگیری ءَ مردمانی زھرشانی وھدیکہ لورلائی ءَ دو ٹولیانی میان ءَ تیرگواری ءَ یک مردمے بیران ءُ دو زدگ بوتگ انت –

شال ءَ ڈنگی ءِ وئیلانی تہ ءَ گیشی اتکگ، دمگی مردم چریشی ءَ دلسیاہ، نوکتریں ھالانی رِد ءَ دُزانی تیرگواری ءَ دگہ دو مردم بیران بوتگ انت –

بلوچستان ءِ مستریں ءُ بنجاھی شھر دُز ءُ ڈنگانی دیمپان انت کہ اودا ھمک روچ مردم پُلگ بوگ ءَ انت یک ماھے ءِ میان ءَ ھپت مردم اے وئیلاں کُشگ بوتگ انت –

مروچی یکشمبے ءِ روچ ءَ شال سریاب ءَ قمبرانی دگ ءَ پرپٹ ءِ پُلگ ءِ ھاتر ءَ دو مردم کُشگ بوتگ انت، وئیل ءِ بگیری ءَ سریاب ءِ جھمننداں دگ بند کتگ ءُ زھرشانی کتگ –

تیرگواری ءَ بیران بوتگیں مردمانی پجار عبدالکریم ءُ اعجاز ءِ ناماں چہ بوتگ انت کہ ھردو پت ءُ چُک انت – چہ اے وئیلاں دمگی مردمانی دل ءَ تُرس ءِ پیداک بوتگ –

درنگاز کنوکانی رِد ءَ واکدار ءُ پھازگی لشکر شھر ءِ ایمنی آرگ ءَ دلگوش دیگ ءَ نہ انت شھر چہ دُز ءُ ڈنگاں پُر انت آھاں چہ سر وزیر ءَ لوٹ کتگ کہ وئیل ءِ بگیری ءَ گامگیج بہ زوریت –

درنگاز کنوکانی رِد ءَ شال ءَ اے دابیں وئیل ھمک روچ گیش بوان انت یک ماھے ءِ میان ءَ ھپت مردم کُشگ بوتگ انت وھدیکہ شال ءِ جھمنندیں مردمانی مال وتی جاہ ءَ نوں آھانی جند پھریز نہ انت –

درنگاز کنوکاں لوٹ کتگ کہ قمبرانی دگ ءَ بوتگیں وئیل ءِ کتکار زوت دزگیر کنگ بہ بنت وھدیکہ شال ءِ نگیگیں جاورانی شر کنگ ءَ واکدار زوت گامگیج بہ زور انت –

دومی نیمگ ءَ بلوچستان ءِ دمگ لورلائی ءَ دو ٹولیانی میان ءَ تیرگواری ءَ وئیل ءَ یک مردمے بیران ءُ دو زدگ بوتگ انت –

تیرگواری ءِ وئیل ءَ جمال خان شمبوزئی بیران بوتگ وھدیکہ گل محمد شمبوزئی ءُ عبدالحکیم شمبو زئی زدگ بوتگ انت –

تیرگواری ءِ وئیل لورلائی ءِ دمگ کلی شمبو زئی ءَ بوتگ ءُ وئیل ءَ بیران ءُ زدگ بوتگیں مردم وت ماں وت پِت ءُ چک اَنت –

ھمے گوشگ بوگ انت وئیل زمینی جیڑوے سوب ءَ بوتگ –