بلوچ ءُ پشتون ریاستی زوراکیانی آماچ انت – ماما قدیر بلوچ

شال پریس کلب ءِ دیم ءَ زورانسری آوار جنگ بوتگیں مردمانی یل نہ کنگ ءِ بگیری ءَ بیگواھیں مردمانی پانکجنیں گل وائس فار بلوچ مسنگ پرسنز ءِ دراج کشیں زھرشانی بنجل ءَ مروچی پنچ ھزار ءُ نود ءُ ھشت روچ سرجم بوتگ انت –

مروچی پی ٹی ایم لورلائی ءِ باسک آصف پشتون، غنی پشتون، عبدالقدیر پشتون ءَ دگہ مردماں بنجل ءَ اتکگ ءُ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ بلوچ پشتون راج اے وھدیں گرانتریں دورے ءِ تہ ءَ گوزگ انت، ھر چاریں نیمگاں زلم ءُ زوراکی ءِ جمبراں مانشاں اتگ – یک نیمگے زورگیری ءِ برجاہ دارگے ھاتر ءَ بلوچ ءُ پشتونانی چکچینی بوگ ءَ انت ءُ دومی نیمگ ءَ راج ءِ پرزند وتی پاکیں ھوناں گوں سرڈگارے پھریزگ انت – ھزارانی کچ ءَ راج ءِ شرپ داریں پرزنداں زورگیریں پوج ءِ دیم ءَ سراں کپن بستگ –

ماما کدیر گوشتگ کہ دومی نیمگ ءَ ھما مردم اَنت وتی راجی زمہ واریانی پیلو کنگ وتی جاہ ءَ آیان ءَ اے مارشت نیست کہ راج جنگ آماچ اِنت ءُ ورنایانی جون بے کپن ءَ کپتگ اَنت۔ بلوچ ءُ پشتونانی گس ماندارگ بیگ ءَ اَنت، بلوچ جنینانی سر ءَ اُرش کنگ ءُ بیگواہ کنگ بیگ ءَ اَنت۔ ڈاکٹر، استاد ءُ زانوگراں ھوار ھمک بھرگاں سیادی داروکیں مردم نشانگ کنگ بیگ ءَ اَنت۔ شست ھزار مرد ءُ سیسد جنین ریاستی چیریں بندیگجاھاں آزارانی دیمپان اَنت زورانسری آوار جنگ بوتگیں مردمانی کھول پہ وتی دوستیگیں مردمانی یل کنائینگے ھاتر ءَ تُن ءُ شد ءِ سما ءَ نہ اَنت ءُ بلوچستان ءِ جتائیں ھند ءُ دمگاں پریس کلب ءُ دمکاں زھرشانی کنگ ءَ اَنت –

آئی ءَ گوشتگ کہ یک نیمگے ءَ جون کپگ ءَ انت ءُ ما انگت ءَ پہ وتی تماھاں سرگنوک ایں، بلوچانی گسانی سر ءَ جیٹ بمبگواری کنگ ءَ اَنت ما پہ وتی روزگار ءَ جیڑگ ءَ اَنت – مارا پہ ھما مردماں جیڑگ لوٹ ایت کہ چیریں بندیگجاھاں آزار سگگ ءَ اَنت بلوچ ءِ کساں کسانیں زھگ پریس کلبانی دیم ءَ شدکشیں زھرشانی گدان ءَ نشتگ ءُ پہ وتی دوستیگیں مردمانی وش ءُسلامتی آجوئی ءَ زھرشانی کنگ ءَ اَنت۔ آ سھب ءَ وانگجاھے روگ ءِ بدل ءَ پریس کلبانی دیم ءَ کائنت – آیا مئے تہ ءَ اے مارشت ھست اِنت کہ اے زھگ وانگجاھاں بہ رو انت بلے مارا بس وتی زھگانی باندات ءِ پگر انت –