مند ءَ زیم ءِ ڈنگ جنگ ءَ زالبولے بیران

کیچ ءِ دمگ مند ءَ زیمے ءِ ڈنگ جنگ ءَ زالبولے بیران بوتگ – دمگی مردماں گوں دی بلوچستان پوسٹ ءِ اھوالکار ءِ گوم ءَ تران کنان ءَ اے درگت ءَ گوشتگ کہ لھتے روچ ساری مند ءِ دمگ براھوئی ریک ءَ سلمیہ ء یاسین زیم ءَ وارتگ گڈا آ میتگ ءِ کلینک ءَ برتگ بلے آودا انجکشن نہ بوتگ چریشی ءِ سوب ءَ آئی ءَ درد نہ سگ اِتگ انت ءُ بیران بوتگ –

دمگی مردمانی گوشگ انت کہ رؤف رند، زبیدہ جلال، اکبر آسکانی ءُ فدا حکیم وڈیں مردم ادا سرکار ءُ پوج ءِ نمائندگ انت ءُ لس مردمانی فنڈاں گر انت ءُ وت ور انت –

آھانی گوشگ ات کہ مند ءَ یک سرکاری نادراھجاھے ھست آ ھم پھال نہ انت وھدیکہ آئی ءِ بجٹ ایف سی بنجل ءَ رؤت ھمے سوب ءَ گیشتریں نادراھاں ایف سی بنجل ءَ پہ الاج ءِ ھاتر ءَ بر انت ءُ نادراھے ھواری ءَ دگہ کس ءَ موکل نیست کہ تہ ءَ بہ روت چریشی ءَ زالبولیں نادراھاہ گیشتر دلسیاہ انت –

مردماں چہ بلوچستان ءِ سرکار ءَ لوٹ کتگ ءُ گوشتگ کہ سول نادراھجاہ پھال کنگ بہ بیت ءُ ڈاکٹر وتی کارے سر ءَ آرگ بہ بنت –