روکپتی بلوچستان ءِ بنجاھی شھر زاھدان ءَ چِلُمی آدینگ ءَ ھم مھلوک ءِ زھرشانی بیتگ –
زاھدان ءَ آدینگ ءِ نماز ءَ پد مھلوک ءَ زاھدان ءَ کُشگ بیتگیں مردم ءُ ایران ءِ لشکر ءِ دست ءَ بیگواہ بیتگیں مردمانی بیگواھی ءِ ھلاپ ءَ زھرشانی اش کتگ-
زھرشانی ءَ بازیں کچے ءَ مردماں بھر زرتگ ءُ ایرانی سرکار ءِ ھلاپ ءَ زھرشانی کتگ ءُ اوگام جتگ –
اوگام جنان ءَ آیاں گوشتگ مئے ’برات شما کُشتگ انت ما ھم ترا کُش ایں ‘ ءُ آیانی دستاں تاک بیتگ اَنت ءُ بیگواھیانی نام ءُ کُشگ بیتگیں مردمانی نام نبشتگ بیتگ انت-
زانگ بہ بیت روکپتی بلوچستان ءِ بنجاھی شھر زاھدان ءَ گوستگیں سال ءِ سِی ستمبر ءَ بیوکیں زھرشانی ءِ سر ءَ ایرانی لشکر ءَ بیڑ برتگ ات چریشی ءَ سد ءِ نزیک ءَ مردم کُشگ ءُ سَے سد ءِ کچ ءَ مردم زدگ بیتگ ات اَنت ءُ چریشی ءَ پد ھمک آدینگ ءَ کُشگ بیتگیں مردمانی یات ءَ زھرشانی کنگ بیت اِنت-
اے زھرشانی ھما وھد ءَ بندات بیتگ اَنت کہ شانزدہ ستمبر ءَ روکپتی بلوچستان ءِ تیابدپی شھر چھبار ءَ ایرانی پولیس ءِ آپیسر ابراھیم کوچگ زئی ءَ یک پانزدہ سالی ئیں جنکوئے ءِ گون ءَ زوراکی کتگ ءُ چریشی ءَ پد روکپتی بلوچستان ءَ یک برانزے بنا بیتگ ءُ اے برانز روکپتی بلوچستان ءِ جتا جتائیں شھراں داں کنگ بیتگ اَنت-