ھاران ءُ جھاؤ ءِ اُرشانی زمّہ واری بہ ایل ایف ءَ منّ اِتگ انت

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ ھاران ءَ سیندک ءِ گاڑیانی سر ءَ اُرش ءُ جاؤ ءَ موبائل ٹاور ءِ ماندارگ ءِ زمہ واری منّ اِتگ انت –

بی ایل ایف ءِ جارکش ءِ رِد ءَ مئے سرمچاراں بیست ءُ شش جون ءِ بیگاہ ءَ ھاران ءَ گواش دگ ءِ نزیک ءَ لُٹ ءُ پلی شوربندی سیندک شرکت ءِ گاڑیانی سر ءَ اُرش کرتگ، ڈرائیور کڈن کتگ ءُ ھمے واست ءَ یل داتگ انت کہ بلوچ بوتگ انت –

جارکش ءِ رِد ءَ اے گاڑی چہ کراچی ءَ پہ سیندک شرکت ءَ مشین ءُ دگہ سامان برگ ءَ بوتگ اَنت ،اے چہ ھاران ءِ دگ ءَ گوزگ ءَ بوتگ انت –

آئی ءَ گوشتگ کہ اے اُرش چین ءُ آدگہ ڈیھاں ھوار پہ درسیں باپاراں بیھارے، بلوچستان یک جنگ آماچ ءُ زورگپتیں ڈیھے اد ءَ بلوچ وتی آجوئی ءِ جنگ ءَ مڑگ ءَ اِنت ،ما کڈن کن ایں کہ بلوچ راج ءِ رزا ءَ اَبید اد ءَ ھچ وڑیں شوربندی ءُ ھچ باپاری مھکم نہ بنت –

میجر گوھرام ءَ وتی درشان ءِ تہ ءَ دیمتر ءَ گوشتگ کہ مئے سرمچاراں آواران ءِ ھند جاؤ ءَ بیست ءُ شش جون ءَ جھل جھاؤ ءِ سوڑ ءَ عطا محمد میتگ ءَ پاکستانی موبائل کمپنی یوپون ءِ ٹاور ءُ مشین ءُ آ دگہ سامان مانداشتگ اَنت –

جارکش ءِ رِد ءَ اے اُرشانی زمہ واری بی ایل ایف منّیت ءُ داں بلوچستان ءِ آجوئی ءَ زورگریں لشکر ءُ اے وڑیں لُٹ ءُ پلی شوربندی مئے نشانگ ءَ اَنت –