ھزدار: دو زھگ آپ ءَ کپتگ ءُ بیران بوتگ انت

سربوتگیں ھالانی رِد ءَ ھئور ءِ آپ ءَ دو زھگ کپتگ ءُ بیران بوتگ انت –

گیشیں ھالانی رِد ءَ بلوچستان ءِ دمگ ھزدار ءَ گوستگیں روچ ءَ بوتگیں ھئور ءِ سوب ءَ بازیں آپ ءِ جم بوتگ چریشی ءَ کہنک ءِ جھمنندیں دو زھگ آپ ءَ بُک اِتگ ءُ بیران بوتگ انت –

ھزدار ءِ واکدارانی رِد ءَ گوستگیں روچ ءَ ترندیں ھئور بوتگ چریشی ءَ شھر ءِ تہ ءَ بازیں آپ ءِ اتکگ ءُ جم بوتگ وھدیکہ بازیں کور ءُ شیپانی آپ ھم اتکگ جم بوتگ انت ھمے سوب ءَ زھگ آپ ءَ کپتگ ءُ بیران بوتگ انت –

واکداراں گونڈلانی جون زرتگ ءُ نادراھجاہ ءَ برتگ انت اودا اژدری چار ءُ ٹپاس پد آھانی جون کھول ءِ دست ءَ داتگ انت –

دومی نیمگ ءَ وئیل ءِ بگیری ءَ کوشک ءَ گونڈلانی جون دگ ءِ سر ءَ ایر کنگ بوتگ ءُ کھول ءِ نیمگ ءَ زھرشانی کنگ بوتگ –

درنگاز کنوکانی گوشگ انت کہ ھر ھما وھد ءَ کہ ھئور بیت گڈا شھر سرجمی ءَ کئور ءِ گندگ کئیت ھمے وڈیں وئیلاں زھگ چہ زند ءَ زبھر بنت بلے واکداراں تشیں ھم پرک نبیت کہ ادے مردم چوں زند گوازینگ ءَ انت –

ھزدار ءِ واکدار بیران بوتگیں زھگانی کھولاں گوں گند ءُ نند کنگ ءَ انت وھدیکہ زھرشانی ءِ سوب ءَ دگ سرجمی ءَ بند انت ھچ وڈیں رؤ آیگ نیست –