بلوچستان ءَ زورانسری آوار جنیانی بگیری ءَ ائید روچ ءَ زھرشانی کنگ ءِ جار جنگ بوتگ

مزنیں ائید ءِ روچ ءَ زورانسری آوار جنیانی بگیری ءَ زھرشانی کنگ بیت – ماما قدیر بلوچ

بیگواھیں مردمانی پانکجنیں گل وی بی ایم پی ءِ کمک سرکماش ماما قدیر بلوچ ءَ مروچی آدینگ ءِ روچ ءَ وتی تامری درشانے ءِ تہ ءَ جار جتگ ءُ گوشتگ ائید ءِ روچ ھما روچ انت کہ درسیں جھان ءِ اسلام منوگر شادمانی کن انت بلے دومی نیمگ ءَ بلوچ راج گوستگیں بازیں سالاں ائید ءِ روچ ءِ دارگ ءَ زبھر انت –

ماما قدیر بلوچ ءَ گوشتگ کہ یک نیمگے مسلمان ائید ءَ شاتکامی کن انت ءُ دومی نیمگ ءَ یک وتگڑیں اسلامی ریاست ءُ مسلمانانی دست ءَ زورانسری آوار جنگ بوتگیں مردمانی کھول وتی دوستگیں مردمانی آوار جنی ءُ ژانگولیں جونانی بگیری ءَ زھرشانی کن انت –

ماما قدیر بلوچ ءَ گوشتگ کہ آھانی گل وائس فار بلوچ مسنگ پرسنز زورانسری آوار جنگ بوتگیں مردمانی کھولانی ھمراھی ءَ ائید ءِ روچ ءَ چہ بلوچستان ءَ زورانسری آوار جنگ بوتگیں مردمانی بگیری ءَ ماں شال ءَ زھرشانی روانک ءِ کشیت –

ماما قدیر بلوچ ءَ شال ءِ درسیں سیاسی ءُ انسانی ھکانی باسکاں ھوار درسیں مردماں گوں دزبندی کتگ کہ آ اے روچ ءَ زھرشانی ءَ بھر بہ زور انت ءُ بیگواھیں مردمانی توار جوڈ بہ بنت –

زانگ بہ بیت کہ ائید ءِ روچ ءَ ماں کراچی ءَ بلوچ مسنگ پرسنز ءِ رھشون سمی دین بلوچ ءِ سروکی ءَ آئی ءِ پت ءِ زورانسری آوار جنی ءِ بگیری ءَ زھرشانی ءُ روانک کشگ بیت انت وھدیکہ بلوچ یکجھتی کمیٹی ءَ اے زھرشانی پلامرزی جار جتگ –