نبشتانک: پگری آجوئی
نبشتہ کار: عائش بلوچ
دی بلوچستان پوسٹ
آجوئی ءِ لبز گیش سیاسی تک ءَ کارمرز بیت، آجوئی ءِ لبز ءِ اش کْنگ ءَ مئے گمان ءَ ھما راج کاینت کہ انگت ایردست انت، ھست بوگ ءِ جھد ءَ ساڑی انت، زنداں ءَ بندیگ انت، دیمونی دیگ ءَ انت۔
چوناھا بنیادم دو وڑ ءَ گلام بیت، یکے جسمانی گلام (physically salve) ءُ دومی پگری گلام، (mental salve)، وھدے مئے ھردوکیں دست سانکلاں بندوک بنت، مئے چم سْیاھیں پُچے ءَ پیڈاؤک بنت ءُ ما زنداں ءِ تھاریں کوٹی ءَ چو یک زندگیں لاشے ءِ ڈولا کپوک بہ بہ ایں گُڑا بزاں ما “جسمانی گلام” ایں ءُ پگری گلام” ھما وھد ءَ بہ ایں وھدے مئے چم پچ بنت بلے مارا ھچ گندگ ءَ نئیت، مارا زبان پر بیت، بلئے ما گُنگ بہ ایں –
بلئے جسمانی گلامی ءَ چہ پگری گلامی گیش تاوان دنت ءُ پگری گلامی ءِ تھر ءُ وڑ جتا جتائیں دْروشم ءَ گندگ ءَ کئیت۔ برے دودمانی رنگ ءَ، برے بیھار ءُ تُرس ءُ برے نیکراھی دْروشم ءَ۔ پہ آجوئی ءِ جھد ءَ ھمے کساس ءَ کہ سرانی دیمونی الّمی انت ھمے کساس ءَ پگری ءُ زانشتی رد ءَ توانہ بوھگ الّمی انت۔ بگندئے پگری رد ءَ آجو بوھگ پہ آجوئی ءِ جھد ءَ بُنشتے بیت کنت۔
ما بہ چاریں کہ استان چتو مئے آجوئی ءِ جھد ءِ سلاہ ءَ مئے پگری گلامی ءَ ودینگ ءِ کوشست کْنگ ءَ انت ءُ اے رد ءَ کجام آسراتیاں کارمرز کْنگ ءَ انت۔ وتی انسان دژمنیں کارپد آں گوں وتی تُرس ءُ بھیم ءَ مئے مجگ ءِ تہ ءَ نادینگ ءِ جھد کْنگ ءَ انت، زانشتی رد ءَ مارا پدمنتگ کْنگ ءِ جھد کْنگ ءَ انت، وتگڑیں نیکراھی راھبندانی رد ءَ مارا ایر جْنگ ءِ کوشست کْنگ ءَ انت۔
پمیشکا الّمی انت کہ یک دیمومنی دیوکیں نپرے استان ءِ رجینتگیں پندلانی ھلاپ ءَ ساڑی بہ بیت، ءُ ھمک ھما مردم کہ پگری آجوئی ءِ رد ءَ جھد کْنگ ءَ انت آ امنچو ارزشت دار ایت امنچو کہ کوھاں رپتگیں دیمونی دیوکیں نپرے، آ ھم امنچو ستاہکرز ایت امنچو کہ دژمن ءِ ھلاپ ءَ سنگر گپتگیں سرمچارے، آ ھم سرمچارے، پمیشکا استان یک سرمچارے ءَ چہ امنچو بھیم وارت امنچو کہ یک پگر تالان کنوکیں نپرے ءَ۔ استان زانت کہ اے نپر آئی ءِ رجینتگیں پندل آں گوں آئی ءَ بْرھنگ کت کنت، ءُ وتی مھلوک ءَ پگری رد ءَ تْونگر کت کنت۔
پگری آجوئی پہ جھد ءَ مستریں آسراتی ءُ سِلہ انت، پگر کہ آجو بیت گڈا ھچ پیمیں نیکراھی راھبند پہ جھد ءَ ھڈاند جوڈ نہ بنت، تُرس کہ پگری نادْراھی یے جیڑھے نہ بیت، ھچ پیمیں دودمانی ءُ ربیدگی جنجال پہ جھد ءَ اوشت ءِ سوْب بیت نہ کنت۔ پگر کہ آجو بیت گڑا گلامیں راج ءِ ھمک تبک پہ جھد ءَ ساڑی بیت، کسان مزن، مردین ءُ زالبول، شپانک ءُ نودربر دْرو یکیں لڑ ءَ بنت، ءُ پہ جھد ءَ ھچ دیگری پشت نہ کپ ایت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔