راشد حسین ءِ بیگواھی ءَ 5 سال سرجم، چاگردی ترامجاھاں ٹرینڈ

بلوچ باسک پاکستان ءَ آرگ ءُ زورانسری آوار جنی ءِ ھلاپ ءَ چاگردی ترامجاھاں کمپئن ٹرینڈ بیتگ-

بلوچ باسک راشد حسین چہ متھدہ ارب امارات ءَ زورانسری بیگواھی ءُ پاکستان ءَ آرگ ءُ بیگواہ کنگ ءَ پنچ سال سرجم بیگ ءِ سر ءَ چاگردی ترامجاھانی کارمرد کنوکانی نیمگ ءَ ٹوئٹر ءَ یک سرپدی مھمے برجم دارگ بیتگ کہ جرمنی ءَ ھوار جتا جتائیں ڈیھاں ٹرینڈ جوڑ بیتگ –

بلوچ باسک بیست ءُ شش دسمبر دوھزار ءَ ھژدہ ءَ ھما وھد ءَ متھدہ ارب امارات ءِ شھر شارجہ ءَ اود ءِ چیریں پولیس ءَ ھما وھد ءَ دزگیر کتگ کہ آ وتی دگہ سیادانی ھواری ءَ گاڑی ءَ سوار بیتگ ءُ دبئی ءِ نیمگ ءَ سپر ءَ بیتگ-

راشد حسین ءِ زورانسری آوار جنی ءِ ھلاپ ءَ بلوچ سوشل میڈیا ایکٹویسٹس ’ بی ایس ایم اے ‘ ءِ نیمگ ءَ برجم دارگ بیتگیں کیمپئن بلوچ سیاسی باسکاں ھوار جتا جتائیں گلاں بندوکیں مردماں ٹوئٹ کنان ءَ بلوچ باسک ءِ یل کنگ ءِ لوٹ کتگ بیتگ-

چہ بلوچستان ءَ زورانسری آوار جنیانی ھلاپ ءَ توار چست کنوکیں گل وائس فار بلوچ مسنگ پرسنز ءَ راشد حسین ءِ زورانسری بیگواھی گیر کانونی گوشان ءُ گوشتگ کی راشد حسین ءِ دراجیں مدتے ءَ بیگواھی ءِ سر ءَ ڈیھی رھبند ءُ انسانی ھکانی سنگینیں لگتمالی یے ھمے سبب ءَ ما لوٹ کن ایں کہ آئی ءِ زورانسری آوار جنی ءِ زنداناں چہ کشگ بہ بیت اِنت-

راشد حسین ءِ مات شال پریس کلب ءِ دیم ءَ زھرشانی بنجل ءَ نیشتگ اود ءَ آئی ءَ انسانی ھکانی گل ءُ سرکار ءَ نیشتگیناں چہ راشد ءِ سلامتی ءِ یل کنگ ءِ لوٹ کتگ –

أاے درگت ءَ راشد ھسین ءِ گوھار فریدہ بلوچ ءَ ٹوئٹ کرتگ ءُ گوشتگ کہ گوستگیں پنچ سالاں مارا مئے برات راشد حسین ءِ بارو ءَ ھچ ھال ءُ اھوال دیگ نہ بیتگ اَنت کہ آ چون ءُ چتور اِنت – اے کجام پٹ ءُ پول اِنت کہ ریاستی ادارہ پنچ سالاں داں ایشی ءَ سرجم کت کنگ ءَ نہ اَنت – آمیدگس ھم ایشی ءَ بے واک اَنت آ راشد ھسین ءَ چے پئیم ءَ دیم ءَ بیار اَنت-