بلوچستان ءِ دمگ نصیر آباد ءَ سلاہ بندیں مردماں لوگے ءَ مانرتکگ ءُ تیرگواری کُتگ ءُ کہ ایشی ءِ آسر ءَ دو جنین آدم کُشتگ ءُ وھدیکہ دگہ دو ٹپی کُتگ اَنت۔
تیرگواری ءِ وئیل نصیر آباد ءِ ھند بابا کوٹ گھڑی رحمن ءَ دیم ءَ اتکگ۔اھوالانی رد ءَ سلاہ بندیں مردم لوگے ءَ پُترتگ اَنت ءُ ترندیں تیر گواری بنداتے کتگ اِش، تیرگواری ءِ سوب ءَ دو جنین آدم بیران بیتگ اَنت وھدیکہ دو مردم ترندی ءَ ٹپی بیتگ اَنت۔
البت داں انگت وئیل ءِ پُشدر زانگ نہ بیتگ اَنت، وھدیکہ پولیس وئیل جاہ ءَ سربیتگ ءُ وئیل ءِ بابت ءَ پَٹ ءُ پول بندات کُتگ اِش۔
ھمے وڑ ءَ تربت ءَ یک ورنایے لین ءَ گپتگ ءُ بیران بیتگ-
بلوچستان ءِ کیچ دمگ ءِ بنجاھی شھر تربت ءَ لین ءِ کرنٹ لگگ ءَ چہ یک مردمے بیران بیتگ۔
وئیل تربت ءَ سنگانی سر ءِ ھند ءَ دیم ءَ اتکگ، بیران بیتگیں مردمے پجار ھشام ء سلیم ءِ نام ءَ چہ بیتگ۔
پولیس ءِ رد ءَ بیران بیتگیں مردم سنگانی سر ءِ جھمنند اِنت کہ غلام نبی پیٹرول پمپ ءِ نزیک ءَ لین ءِ کار کنان ءَ کرنٹ لگگءَ چہ بیران بیتگ۔
آئی ءِ لاش المی کارانی ھاتر ءَ ٹیچنگ نادراھجاہ تربت ءَ دیم دیگ بیتگ ءُ پد ءَ کھول ءِ دست ءَ دیگ بیتگ۔