اسپین ءَ ڈرانڈیھان روکیں بوجیگ بڈ اتگ ءُ سی ءُ چار مردم بیگواہ، دو لاش کشگ بیتگ انت

اسپین ءِ جزیرہ کینیری ءِ زر ءَ ڈرانڈیھاں روکیں بوجیگ بڈ اتگ چریشی ءَ سواریں زھگے ءَ ھوار دو مردمانی لاش کشگ بیتگ اَنت ءُ دگہ بڈ اتگیں سِی ءُ چار مردمانی لاش بیگواہ-

اھولانی رد ءَ کینیری ءِ جزیرہ ءِ نیمگ ءَ روکیں بوجیگ ءَ شست مردم سوار بیتگ اَنت ءُ ایشانی توک ءَ دو درزن مردم سلامتی ءَ کشگ بیتگ اَنت-

اسپین ءِ ھال سرکنوکیں ادارہ میری ٹائم ایجنسی ءِ رد ءَ مراکشی واکداراں بھریہ ءُ بھری واکداراں ھما دمان ءَ کمک کنان ءُ بیست ءُ چار مردم بچینتگ اَنت-

پناہ گزینانی واستا کار کنوکیں این جی او واکنگ بارڈر ءَ وئیل ءِ ھال داتگ ءُ گوشتگ کہ سواریں دراھیں مردم درملکی بیتگ اَنت-

اسپین ءِ میری ٹائم ءِ رد ءَ ریسکیو سروس ءِ گوشگ اِنت گران کینریا ءِ زرباری رودراتک ءَ ھشتاد ءُ ھشت مل دوری ءَ ریسکیو ءَ پٹ ءُ پول کنان ءَ بڈ اتگیں مردم بچینتگ اَنت-

اسپین میری ٹائم ءِ رد ءَ بوجیگ پچین زر ءَ ھراب بیتگ چریشی ءِ سبب ءَ آ بڈ اتگ ءُ اے وئیل ءُ ریسکیو ءَ را اے ھال مراکشی واکدارانی نیمگ ءَ رس اتگ-

آئی ءَ گوشتگ کہ ھیلی کاپٹر ءِ کمک ءَ بندات کرتگیں پٹ ءُ پول ءِ وھد ءَ یک زھگے ءِ لاش دزکپتگ ءُ آئی ءِ لاش کینریا ءِ بالیگ ءَ رسینتگ ءُبپد ءَ بھری جھاز ءِ گون ءَ پٹ ءُ پول ءِ وھد ءَ دگہ یک لاشے دزکپتگ-

واکدارانی جارکش ءَ اسپین میری ٹائم ءَ گوشتگ کہ ما نزان ایں بوجیگ ءَ چنکس مردم سوار بیتگ اَنت بلے شست ءَ گیش مردم سوار بیت کُت کنت-