ایرانشھر: دو ورنا ایرانی لشکر ءِ دست ءَ بیگواہ

روکپتی بلوچستان ءِ دمگ ایرانشھر ءَ ایرانی لشکر ءَ دو دزگیر کنگ ءَ پد بیگواہ کرتگ اَنت-

گیشیں اھوالانی رد ءَ بیگواہ کنگ بیتگیں مردمانی پجار ھژدہ سالی ئیں عامر داد آفرین بیست ءُ پنچ سالی ئیں مھمد ملازئی ءِ ناماں زانگ بیتگ اَنت ھردوک ایرانشھر ءِ جھمنند اَنت –

چہ روکپتی بلوچستان ءَ سر بیتگیں اھوالانی رد ءَ عامر ماھے ءَ پیش درملک ءَ شتگ بیتگ کہ آئی ءِ مات ءُ گوھار ماں انسانی ھکانی واستا کار کنوکیں گلاں بندوک اَنت چرے سبب ءَ عامر ایرانی چیریں ادارھاں دزگیر کتگ ءُ برتگ-

اھوالانی رد ءَ اے ھردوکیں ورنایاں گوں سیاسی پرکاریاں ھچ وڑیں سُر ءُ پراں گوں دزمانجنی نیست اِنت بلے ایشی ءَ ابید ھم اے دزگیر کنگ ءُ بیگواہ کنگ بیتگ اَنت-

ھمے داب ءَ ماں زاھدان ءَ یک سد ءُ شست ءُ نُھ روچاں بندیگیں مردمے ھم یل بیتگ –

یل بیتگیں مردم ءِ پجار اسھاک ریکی ءِ نام ءَ زانگ بیتگ کہ گوستگیں یک سد ءُ شست ءُ نُھ روچاں پیش ماں زاھدان ءَ شھرک کرم شاہ ءَ آوار جنگ ءُ بیگواہ کنگ بیتگ –