شال: زورانسری آوارجنیانی بگیری ءَ زھرشانی برجاہ

بلوچستان ءِ بنجاھی شھر شال ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، اے دراجکشیں زھرشانی ءَ مروچی پنچ ھزار ءُ ھشتاد ءُ دو روچ سرجم بوتگ انت –

مروچی چہ مستونگ ءَ سیاسی ءُ چاگردی باسک دوست محمد بلوچ، دولت خان بلوچ، نور محمد بلوچ ءُ دگہ مردماں بنجل ءَ اتکگ ءُ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ اے دراجیں پند ءِ مول ءُ مراد میان استمان، انسانی ھکانی ادارہ ءُ اقوام متحدہ ءَ ھوار ایندگرانی دیم ءَ پاکستانی راستیگیں دیمے پدر کنگ انت، بلوچانی سر ءَ زورگیریں ریاست ءِ زلم ءُ زوراکیاں جھان ءِ دیم ءَ پیش دارگ انت –

آئی ءِ گوشگ ات کہ پاکستانی راستیں دیم ءُ بلوچانی سر ءَ برجاھیں زوراکی ءُ چکچینیاں جھان سرپد کنگی انت ءُ بلوچ ءِ پُرایمنیں جھد میان استمانی تک ءُ پھناتاں مھکم کنگی انت –

ماما قدیر بلوچ ءَ گوشتگ کہ بلوچستان ءِ نمیرانیں سرانی دیمھونیاں بلوچ جھد ءَ روھے بکش اِتگ اے گوشگ رد نہ بیت کہ جھد ءِ تہ ءَ انکلاب ءِ بندات پھتو کتگ کہ چریشی ءَ پاکستانی ریاست ءَ گبرائینتگ ءُ بلوچستان ءِ تہ ءَ راجکاری چست ءُ ایرانی سر ءَ مدامی ھاتر ءَ بندش جتگ ءُ اشی ءَ ھوار ھوار سدانی کچ ءَ وتگڑیں ءُ نزرویں مردم چہ انکلابی زانشت ءِ زر ءَ یکر کُتگ انت –