آواران ءُ اوستہ محمد ءَ پوج ءُ ناشناسانی تیرگواری ءَ دو مردم بیران

سربوتگیں ھالانی رِد ءَ آواران ءَ پاکستانی پوج ءِ تیرگواری ءَ یک مردمے بیران بوتگ دومی نیمگ ءَ اوستہ محمد ءَ ناشناسیں سلاہ بندیں مردمانی تیرگواری ءَ ورنایے بیران بوتگ –

گیشیں ھالانی رِد ءَ بلوچستان ءِ دمگ آواران ءَ پاکستانی پیرا ملٹری فورس (ایف سی) یک مردمے تیرانی آماچ کُتگ ءُ کُشتگ –

پوج ءِ تیرگواری ءَ بیران بوتگیں مردمے پجار سمیر جھمنند کورک جھاؤ ءِ نام ءَ بوتگ –

اھوالکار ءِ رِد ءَ اے مرد وت پولیس ءَ کار ءَ بوتگ وھدیکہ تیرگواری ءِ وئیل گوستگیں روچ ءَ ھما وھد ءَ بوتگ کہ اے مردم وتی پرپٹ ءِ سر ءَ چہ جھاؤ ءَ دیم پہ آواران ءَ رؤگ ءَ بوتگ –

بلے پدا ھم واکدارانی نیمگ ءَ اے درگت ءَ ھچ گوشگ نہ بوتگ –

دومی نیمگ ءَ بلوچستان ءِ دمگ اوستہ محمد ءَ ناشناسیں سلاہ بندیں مردمانی تیرگواری ءَ یک ورنایے بیران بوتگ –

تیرگواری ءِ وئیل گوٹھ غلام جان بخسلانی جمالی بوتگ، تیرگواری ءَ بیران بوتگیں ورنایے پجار ھژدہ سالی محمد یونس ءِ نام ءَ بوتگ –

اھوالکار ءِ رِد ءَ ناشناسیں مردماں گوستگیں شپ ءَ سھب ءِ ادار چار ءَ بندہ علی جمالی ءِ گِس ءَ تیرگواری کتگ چریشی ءَ بندہ علی ءِ ورنائیں زھگ محمد یونس بیران بوتگ ورنا ھما وھد ءَ تیرانی آماچ کنگ بوتگ کہ آ واب بوتگ –

ھال ءِ سربوگ ءَ پولیس ءَ وت ءَ وئیل جاہ ءَ سرکتگ، جون نادراھجاہ ءَ برتگ ءُ اودا چار ٹپاس ءَ پد کھول ءِ دست ءَ داتگ کتکارانی شوھاز برجاہ انت –

وئیل ءِ درگت ءَ گوشگ بوگ ءَ انت کہ اشانی دیرگیں وت ماں وتی دژمنی ءِ بوتگ –