کرمان ءَ زاھدان ءِ جھمنند پاھو دیگ بیتگ

ایران ءِ استان کرمان ءِ مزنیں زندان ءَ یک بندیگیں بلوچے پاھو دیگ بیتگ –

گوستگیں روچ ءَ ایران ءِ اُستان کرمان ءِ بندیگ جاہ ءَ فضل اھمد غفران نامی ئیں یک بلوچے پاھو دیگ بیتگ –

انسانی ھکانی گل ھینگاؤ ءَ سربیتگیں اھوالانی رد ءَ یک شمبے ءِ روچ ءَ بامسار ءِ وھد ءَ روکپتی بلوچستان ءِ بنجاھی شھر زاھدان ءَ بندوکیں یک مردمے ماں کرمان ءِ بندیگ جاہ ءَ پاھو دیگ بیتگ –

آئی ءَ گوشتگ کہ پاھو دیگ بیتگیں مردم ءِ فضل ءِ نام ءَ زانگ بیتگ ءُ آ نشہ باپاری ءِ بھتام ءَ ایرانی سرکار ءَ پاھو داتگ –

آئی ءِ رد ءَ فضل چار سال ءَ پیش ماں کرمان ءَ ایرانی سرکار ءَ دزگیر کتگ ءُ پد ءَ آمیدگس ءَ آئی ءِ سر ءَ نشہ باپاری ءِ بھتام ءَ ماں پاھو ءِ ھکم داتگ بیتگ-

گل ءِ رد ءَ ایران ءَ مئی ماہ ءَ ایرانی آمیدگس ءَ یک سد ءُ چل ءُ دو مردم پاھو داتگ اَنت کہ ایشانی توک ءَ سِی ءُ یک بلوچ ھوار اَنت –