مند: پاکستانی پوج ءِ دست ءَ زورانسری آوار جنگ بوتگیں ورنایے یل بوتگ

مند ءِ دمگ گواک ءَ پاکستانی پوج ءِ دست ءَ زورانسری آوار جنگ بوتگیں ورنایے یل بوتگ ءُ وتی گِس ءَ سر بوتگ –

اھوالکار ءِ رِد ءَ مند ءِ دمگ گواک ءَ پاکستانی پوج ءِ دست ءَ زورانسری آوار جنگ ءُ بیگواہ بوتگیں حاصل ء صمد جھمنند مند گواک مروچی چہ آزار جاھاں یل بوتگ ءُ وتی گِس ءَ سربوتگ –

حاصل ء سمد ھمے سال ءِ چاردہ پروری ءَ زورانسری آوار جنگ بوتگ کہ پاکستانی پوج ءَ آئی ءِ گس ءَ بیڑ برتگ ءُ زوراکی کنان ءَ آ آوار جتگ ءُ بیگواہ کتگ بوتگ کہ مروچی چہ تربت ءَ یل بوتگ ءُ وتی گِس ءَ سربوتگ –

زانگ بہ بیت بلوچستان ءِ جتا جتائیں ھند ءُ دمگاں پاکستانی پوج ءِ زوراکی ءُ زورانسری آوار جنیانی درچ یکشل ءَ برجاہ انت، کہ آھانی تہ ءَ کمے کساس ءَ مردم یل دیگ بہ بنت وھدیکہ دومی نیمگ ءَ دوسری آوار جنگ ءُ بیگواہ کنگ بنت – ھمے داب ءَ کہ مروچی یک مردمے یل بوتگ بلے گوستگیں دو روچانی میان ءَچہ کیچ ءُ پنجگور ءَ دگہ شش ورنا زورانسری آوار جنگ ءُ بیگواہ کنگ بوتگ کہ آھانی پجار یحییٰ، ساجد، عبداللہ، شَے مرید، فتح ءُ مسلم ءِ ناماں چہ بوتگ انت ـ