پنجگور ءَ پاکستانی پوج ءِ سر ءَ بوتگیں اُرش ءِ زمہ واری بی ایل اے ءَ من اتگ

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ ماں وتی آفیشل ٹیلیگرام چینل “ھکل” ءَ شنگ کرتگیں درشان ءِ تہ ءَ گوشتگ کہ مئے سرمچاراں پنجگور سی پیک دگ ءِ نزیک ءَ شاھو کھن ءَ زورگریں پاکستانی پوج ءِ کاروان ءَ ھواریں یک گاڑی یے تراکناکیں شوروانی نشانگ جوڑ کتگ –

جارکش ءِ رِد ءَ تراکناکیں شورانی اُرش ءَ دژمن ءِ دو کارمند مرتگ انت ءُ کم چہ کم سَے زدگ بوتگ انت وھدیکہ گاڑی ءَ سک باز تاوان رس اتگ –

بی ایل اے ءِ جارکش جیئند بلوچ ءِ رِد ءَ بلوچ لبریشن آرمی اے اُرش ءِ زمّہ واری ءَ منیت ءُ ما اے کول ءَ کنیں کہ زورگریں پاکستانی پوج ءِ سرجمی ءَ درآیگ ءَ تاں مئے کار ھمے داب ءَ برجاہ مان انت –