سی ٹی ڈی ءِ دروگیں میڑ: یک دگہ لاشے ءِ دو سال ءَ پد پجار بوتگ

لاش ءِ پجار عبدالقیوم زھری ءِ نام ءَ چہ بوتگ کہ سال دوھزار بیست ءَ پاکستانی پوج ایف سی ءَ چہ ھب چوکی ءَ زورانسری آوار جتگ ءُ بیگواہ کتگ بوتگ –

دو سال ساری شال ءِ نادراھجاہ ءَ آرگ بوتگیں یک دگہ لاشے ءِ پجار آئی ءِ کھول ءَ کتگ، کاؤنٹر ٹررزم ڈپارٹمنٹ سَے مردمانی جنگ ءِ ٹاہ داتگ ات کہ آھانی تہ ءَ مروچی دو مردمانی پجار کنگ بوتگ کہ آ پیش ءَ زورانسری آوار جنگ ءُ بیگواہ کنگ بوتگ انت –

عبدالقیوم زھری ء زھری خان ءِ کھول ءِ رِد ءَ آھاں مروچی چہ چاگردی ترامجاھاں ھال رستگ کہ عبدالقیوم ءِ لاش بے وارس کنگ ءُ کل کسارت کنگ بوتگ –

کھول ءِ رِد ءَ عبدالقیوم سال دوھزار بیست ءَ پاکستان ءِ پھازگی لشکر ءَ چہ بلوچستان ءِ دمگ ھب چوکی ءَ زورانسری آوار جتگ ءُ گوں وت برتگ کہ ھما انت گار بوتگ –

اشی ءَ پیش مروچیگیں روچ ءَ یک دگہ لاشے ءِ پجار سال دوھزار بیست ءُ یک ءِ جنوری ماہ ءَ چہ ھزدار ءِ دمگ زھری ءَ زورانسری آوار جنگ بوتگیں ناصر جان قمبرانی ءِ نام ءَ چہ بوتگ کہ آئی ءِ کبر کونڈگ بوتگ لاش درکتگ ءُ آئی ءِ بنکی ھنکین ءَ برگ ءُ کھول ءِ دست ءَ دیگ بوتگ –

زانگ بہ بیت کاؤنٹر ٹررازم ڈیپارٹمنٹ ءَ سِی اگست دوھزار ءُ بیست ءُ یک ءَ ھزدار ءِ ڈی سی ءُ آواران ڈی سی ءَ ھوار ایندگہ واکداراں یک نمدی ءِ دیم داتگ ءُ گوشتگ انت کہ ناصر فاروق ء غلام فاروق جھمنند صادق آباد زھری میتگ، غلام جان ء باران جھمنند بائی پاس شال، عبدالقیوم ء زھری خان جھمنند زھری ھزدار، کمال خان ء باہوٹ جھمنند چُکی آواران یک میڑے ءَ جنگ بوتگ انت –

سی ٹی ڈی ءِ رِد ءَ میڑ ءَ جنگ بوتگیں اے مردم بے وارس گوشگ بوتگ ءُ ایدھی ءِ کمک ءَ کل ءُ کسارت کنگ بوتگ انت – بلے پدا ھم سی ٹی ڈی ءَ اے دروگیں میڑے درگت ءَ ھچ وڈیں گیشیں سرپدی نہ داتگ –

دومی نیمگ ءَ اے مردمانی کھول دوسال انت کہ لاشانی درگت ءَ ھچ سرپد نہ بوتگ انت، واکداراں آھانی کھول ھچ وڈیں سرپدی نہ داتگ انت –

دشت تیرہ میل ءَ سدانی کچ ءَ لاش کل کنگ بوتگ انت بلے سیاسی ءُ چاگردی تک ءُ پھناتاں سیادی داروکیں مردم مدامی اے گپ ءَ جنگ ءَ انت کہ اے لاشانی تہ ءَ گیشتریں کچ زورانسری آوار جنگ بوتگیں مردمانی انت کہ آھانی تہ ءَ بازینے نادراھجاہ ءَ آرگ بوتگ بلے سک باز ژانگول بوتگ انت –

اے مردمانی گوشگ انت کہ واکدار لاشانی پجار ءِ ھاتر ءَ آھانی ڈی این اے ٹیسٹ ءُ دگہ چار ءُ ٹپاس نہ کن انت ءُ آھاں بے وارس گوش انت-