زورانسری آورجنیانی بگیری ءَ مزنیں ائید ءِ روچ ءَ ماں کراچی ءَ زھرشانی کنگ بیت انت – سمی دین

الم بوانیت

بیگواھیں مردمانی پانکجنیں گل وائس فار بلوچ مسنگ پرسنز ءِ جنرل سیکرٹری ءُ بیگواھیں ڈاکٹر دین محمد بلوچ ءِ زھگ سمی دین ءَ ماں رسانکدراں وتی شنگ کرتگیں درشانے ءِ تہ ءَ گوشتگ کہ منی پت ڈاکٹر دین محمد بلوچ ءِ زورانسری آوار جنی ءَ بیست ءُ ھشت جون ءَ چاردہ سال سرجم بوگ انت –

آئی ءَ گوشتگ کہ وتی پت ءِ وش ءُ سلامتی یل کنائینگ ءَ ھوار درسیں زورانسری آوار جنگ بوتگیں بلوچانی یل کنائینگ ءِ ھاتر ءَ آھانی کھولانی ھمراھی ءَ مزنیں ائید ءِ روچ ءَ ماں کراچی ءَ روانک ءُ زھرشانی کنگ بیت اِنت – ھمے وڈ ھرسال بیست ءُ ھشت جون ءَ مئے کھول ڈاکٹر دین محمد ءِ یل کنائینگ ءِ ھاتر ءَ زھرشانی کنت، گڈا اے سال ءَ اے روچ مزنیں ائید انت گڈا ما ائید ءَ درسیں زورانسری آوار جنگ بوتگیں مردمانی کھولانی ھمراھی ءَ زھرشانی کن ایں –

سمی دین بلوچ ءِ گوشگ ات کہ آئی ءَ چاردہ سال انت کہ وتی پت ءِ زورانسری آوار جنی ءِ بگیری ءَ زھرشانی کنگ ءَ انت – کراچی ءِ گرمی بہ بیت یا اسلام آباد ءُ شال ءِ سارتی، ھزار کلیومیٹر گیش پیادگ پند بہ بیت یا دراجکشیں زھرشانی نندانک، پولیس ءُ پوج ءِ لٹ کُٹ بہ بنت یا آمیدگس ءُ کمیشنانی پیشی، ما اے چاردھیں سالاں بازیں درد سگ اتگ انت –

“مناں ھوار بیگواھیں بلوچانی کھول کہ آھانی تہ زھگ ءُ پیریں مات ھم ھوار انت کہ وتی دوستیگیں مردمانی ھاتر ءَ مدامی زھرشانی کنگ ءَ انت، یک نیمگے مسلمانیں ڈیھ ائید ءِ وشیاں وتی کھولانی ھمراھی شاتکامی کنگ انت وھدیکہ ما مدامی وڈا ائید ءِ روچاں وتی دوستگیں مردمانی یل کنائینگے ھاتر ءَ پریس کلب، دگ ءُ چار راھانی سر ءَ درکائیں –

آئی ءَ چہ کراچی ءِ مھلوک ءَ دزبندی کتگ ءُ گوشتگ کہ ائید ءِ روچ ءِ رونک ءَ بھر بہ زور انت ءُ مئے ھمراھداری ءَ بہ کن انت –

نوکتریں