زاکر مجید ءِ زورانسری آوار جنی ءِ بگیری ءَ پرزانہ مجید ءِ ماں امریکہ ءَ زھرشانی

زورانسری آوار جنگ بوتگیں بلوچ نودربر رھشون زاکر مجید ءِ گھار پرزانہ مجید ءَ وتی برات ءِ چاردہ سال سرجم بوگ ءَ ماں نیویارک ءَ زھرشانی کنان ءَ وتی برات ءِ یل کنگ ءِ لوٹ کتگ –

آئی ءَ ماچاگردی ترامجاہ ٹویٹر اکس داتگ ءُ گوشتگ کہ مروچی ھشت جون دوھزار بیست ءُ سَے انت کہ من نیویارک آں ءُ وتی برات ءِ یل کنگ ءِ لوٹ ءَ کنگ ءَ آں – آئی ءَ گوشتگ کہ منی برات زاکر مجید ءِ ماں پاکستانی پوجی زانداناں وش ءُ سلامتی یل کنائینگے ھاتر ءَ میان استمانی ادارہ منی کمک ءَ بہ کن انت –

زانگ بہ بیت زاکر مجید ءِ یل کنائینگے ھاتر ءَ آئی ءِ کھول ءُ سیاسی ادارہ جوانی سیاسی مھم ھم چلائینتگ، زاکر مجید ءِ گھار پرزانہ مجید ءَ ماما قدیر ءِ ھمراھی ءَ بلوچستان ءَ زورانسری آوار جنگ بوتگیں سیاسی باسکانی ھاتر ءَ شال ءَ بگر تاں کراچی ءُ پدا تاں اسلام آباد ءَ دراجیں پند ھم بھر بوتگ –

زاکر مجید ءِ گھار پرزانہ مجید ءَ آئی ءِ یل کنائینگے ھاتر ءَ پُریں پنچ سالاں پریس کلب ءُ زھرشانیانی سروکی کتگ ءُ زاکر مجید ءِ مات گوستگیں چاردہ سالاں شال، کراچی ءُ اسلام آباد ءَ زھرشانی کنگ ءَ انت بلے چاردہ سالانی گوزگ ءَ پد ھم آ یل کنگ نہ بوتگ ـ

گوستگیں روچاں زاکر مجید ءِ کھول ءُ چاگردی ءُ سیاسی باسکاں بیگواھیں بلوچانی روچ ءَ شال ءُ کراچی ءَ مراگشاں ھوار زھرشانی ھم کتگ ات –