زاکر مجید: بودیشت ءِ بندیگ
ٹی بی پی شونگال
پاکستان ءِ ڈیھی ادارگاں گمانی پئیم ءَ چہ بلوچستان ءَ ھزاراں سیاسی باسک زورانسری بیگواہ کُتگ اَنت، کہ اشانی تہ ءَ بازیں دو دھکاں چہ زورانسری بیگواہ اَنت۔ بلوچ اسٹوڈنٹس آرگنائزیشن ءِ وائس چیرمین زاکر مجید نودربر سیاست ءَ گوں بندوک بیتگ، آ دوھزار ءُ شش ءَ سیاسی سر ءُ پُرانی تہ ءَ بھر زیرگ ءِ پُشدر ءَ پولیس ءَ دزگیر کُتگ اَت ءُ بازیں ماھاں داں ھزدار ءِ جیل ءَ بندیگ کنگ بیتگ اَت۔ زاکر مجید ھشت جون دو ھزار ءُ نُھ ءَ چہ مستونگ پڑنگ آباد ءَ زورانسری بیگواہ کنگ بیتگ اَت۔ زاکر مجید ءِ سیاسی سنگت زاھد بلوچ ھم زورانسری بیگواہ کنگ بیتگ ءُ آئی ءِ سنگت شفیع بلوچ، کمبر چاکر ءُ سنگت ثناہ زورانسری بیگواھیاں ءَ کُشگ بوتگ اَنت ۔
“زاکر، کہ آ من ودی کُتگ، آ رسُتگ مزن بیتگ ءُ وتی راج ءِ زورانسری پچگرگ بیتگیں اگبالانی سمائی ءَ وتی پئیمیں نودربرانی تہ ءَ تالان کنگ ءَ بیتگ، آ پاکستانی چیریں ادارگاں بیگواہ کُتگ ءُ چہ مارا زر ءِ ھم لوٹ ھم نہ کُتگ۔زندگیں زِردیں مردم گری ءُ شمئے سمائی شمارا لاچار کنت کہ شما منی ناتوانیں توار ءِ ھمراہ داری بہ کن اِت دانکہ شمئے گالوار پجار جوڑ بہ بنت ءُ مردمی زرد ءَ چہ مرگ ءِ امباز ءَ چہ رکینگ ءُ آرگ بہ بیت۔” زاکر مجید ءِ مات ءِ اے لبز ھما بلوچ ماتانی جارکشی ءَ کن اَنت، کہ آ چہ دو دھکاں وتی چُکانی سلامتیں دروشم ءَ یل کنائنگ ءِ ھاتر ءَ جد ءُ جھد کنگ ءَ اَنت۔
زاکر مجید ءِ یل کنائنگ ءَ پہ آئی ءِ کھول ءُ سیاسی ادارگاں مھکمیں سیاسی تُکشام جُنزینتگ، زاکر مجید ءِ گوھار فرزانہ مجید، ماما قدیر ءِ پجیگ ءَ بلوچستان ءِ زورانسری بیگواھیں سیاسی باسکانی آجوئی ءِ ھاتر ءَ شال – کراچی ءُ کراچی – اسلام آباد لانگ مارچ ءِ بھر اَت۔ زاکر مجید ءِ گوھار فرزانہ ءَ آئی ءِ یل کنائنگ ءِ ھاتر ءَ پنچ سالاں داں پریس کلبانی دیم ءَ زھرشانی ءُ مچیانی سروکی کُتگ، ءُ زاکر مجید ءِ مات چاردہ سالاں چہ شال ، کراچی ءُ اسلام آباد ءَ زھرشانی کنگ ءَ اِنت بلے چاردہ سالاں پد ھم آ دیم ءَ آرگ نہ بیتگ۔
بلوچستان ءَ بلوچ انسرجنسی ءِ تہ ءَ تُرندی ءُ شدت آیگ ءَ گوں بلوچ سیاسی باسکانی زورانسری بیگواھیانی تہ ءَ گیشی اَتکگ ءُ بلوچ آجوئی ءِ جھد ءَ بندوکیں ادارگانی رھشون ءُ باسک زورانسری بیگواھی ءِ آماچ کنگ بیتگ اَنت۔ بلوچستان ءَ دو دھکاں پد ھم زورانسری بیگواھی ءِ یکشلی ءِ درچ برجاہ اِنت ءُ پاکستانی ادارگ ھمے سرپد بنت کہ بلوچ سیاسی باسکانی زورانسری بیگواھی ءَ چہ بلوچ راجی جُنز ءَ کاونٹر کُت کن اَنت کہ اِیش آیانی بلوچ راجی جد ءُ جھد ءِ راجدپتر ءَ بے سمائی زانگ بیت اِنت۔
بلوچ راجی آجوئی ءِ جد ءُ جھد گوستگیں دو دھکاں چہ برجاہ اِنت ءُ وھد ءِ پجیگ ءَ جنگ ءِ تہ ءَ تُرندی پیداک اّنت۔ پاکستان سیاسی باسکانی زورانسری بیگواھیاں درچ ءِ تک ءَ جُنز ءَ ھلاس کُت نہ کنت۔
پاکستان ءَ بلوچ راجی جیڑہ ءِ گیوار کنگ ءِ ھاتر ءَ زورانسری بیگواھیں مردم یل کنگ ءُ بلوچ راجی جُنز ءَ بندوکیں ادارگاں گوں سنگینیں گپ ءُ تران ءِ بندات کنگ لوٹ ایت گُڑا بوت کنت اے جیڑہ ءِ پُر ایمنیں گیواری یے در بہ کپ ایت۔