زاکر مجید ءِ زورانسری آوار جنی ءَ چاردہ سال سرجم، شال ءَ مراگش

نودربر رھشون زاکر مجید بلوچ ءِ زورانسری آوار جنی ءَ چاردہ سال سرجم بوتگ انت، اے درگت ءَ ماں شال ءَ مراگش ءِ برجم دارگ بوتگ وھدیکہ کراچی پریس کلب ءِ دیم ءَ یک روچی زھرشانی بنجل ءِ برجم کنگ بوتگ –

بیگواھیں بلوچ نودربر رھشون زاکر مجید ءِ زوانسری آوار ءُ یل کنائینگے درگت ءَ ماں شال ءِ پریس کلب ءَ مراگش ءِ برجم دارگ بوتگ کہ اودا ھر تک ءُ پھناتاں سیادی داروکیں مردماں ھوار ورنا ءُ بیگواھیں مردمانی کھولاں بھر زرتگ –

مراگش ءَ بیگواھیں زاکر مجید ءِ مات ءَ ھم بھر زرتگ ءُ تران کتگ –

ترانکارانی گوشگ ات کہ زاکر مجید نودربر رھشونے ءُ بلوچستان ءِ منّ اِتگیں رھشونانی رم ءَ ھوار انت – آئی ءَ یک سیاسی باسکے ءِ وڈا بلوچستان ءِ کُنڈ کنڈ ءَ شتگ ءُ مھلوک سرپدی داتگ آھانء ھک ءُ استان ءِ ناھکیانی درگت ءَ مردم سرپد کتگ انت بلے بدکسمتی ءَ مروچی چاردہ سال انت کہ زندانی انت ءُ آئی ءَ درانسانی ازیت دیگ بوگ ءَ انت – زاکر ءِ درگت ءَ تنی وھدی استان ھچ گوشگ ءَ نہ انت زاکر ءِ مات ءُ آئی ءِ گھار فرزانہ مجید گوستگیں چاردہ سالاں زاکر ءِ یل کنائیگے جھد ءَ کنگ ءَ انت بلے استانی ادارہ ھچ وڈیں سرپدی دیگ ءَ نہ انت –

آھانی گوشگ ات کہ زورانسری آوار جنی در انسانی کارے، ملکی ءُ میان استمانی کانودانی تہ ءَ یک مردمے ءَ زورانسری آوار جنگ ءُ بیگواہ کنگ بلاھیں جرمے بلے زاناں بلوچستان جھان ءِ ھما یکیں دمگ انت کہ اودا کانود ءِ پھازوک کانود ءَ نہ منّ انت – پھازگی لشکر ءِ نیمگ ءَ گوستگیں بیست سالاں ھزارانی کچ ءَ بلوچ ورنا زورانسری آوار جنگ ءُ بیگواہ کنگ بوتگ انت سدانی کچ ءَ ژانگولیں جون چگل دیگ بوتگ انت، ھزارانی کچ ءَ ورنا زندانانی تہ ءَ ازیت سگگ انت – زورانسری آوار جنی ءِ اے دردناکیں دتچ روچ پہ روچ گیش بوان انت ءُ مروچاں اشی ءِ تہ ءَ گیشی گندگ ءَ کیت – بلوچ نودربر ءُ دستگوشیِ بلوچ ورنا بید جرم ءَ زورانسری آوار جنگ ءُ بیگواہ کنگ بوگ ءَ انت –

ترانکارانی گوشگ ءَ انت کہ زورانسری آوار جنی ءِ اے کار ءَ تھنا یک مردمے سانمند نہ انت بلکنہ ءَ آئی ءِ سرجمیں کھول یکجاھی اے درد ءَ سگگ انت – بلوچستان ءِ ھزارانی کچ ءَ کھول اے وھدی وتی دوستگیں مردمانی یل بوگے ودار انت – سدانی کچ ءَ مات وتی بچانی ھاتر ءَ دگانی سر ءَ ارس گوارگ ءَ انت – سدانی کچ ءَ گسانی یکیں کمائینوک بیگواہ انت ءُ بلوچ کھول سک باز مالی جاورانی دیمپان انت – ریاستی ادارھانی نیمگ ءَ زورانسری آوار جنی سیاسی ڈھال کارمرز بوگ ءَ انت – چہ اے کار ءَ سرجمیں چاگرد ترس ءِ آماچ انت – ھما کہ توار چست کنگ ءَ انت درانسانی آ ھاموش کنگ بوگ ءَ انت ءُ پدا بیگواھیں مردمانی کھولاں ھچ وڈیں کانودی ھک دیگ بوگ ءَ انت –

آھانی گوشگ ات کہ زاکر مجید ءَ ھوار سدانی کچ ءَ بلوچ نودربراں گوستگین دھ سالاں گیش انت کہ بیگواہ انت ءُ ازیت سگگ انت – زاکر مجید بلوچستان ءِ بلوچ نودربر رھشونے ءَ ھوار بلوچ راج ءِ ھاتر ءَ یک مھکمیں توارے بوتگ کہ آئی ءِ ھاموش کنگ ءِ ھاتر ءَ ریاستی ادارھاں زاکر مجید چاردہ سال انت کہ بندیگ کتگ ءُ ازیت دیگ ءَ انت – زاکر مجید ءِ زورانسری آوار جنی ءَ چاردہ سال سرجم بوتگ انت ءُ زاکر مجید ءِ مات گوستگیں چاردہ سالاں وتی جگر ءِ ٹکر ءِ ھاتر ءَ درپہ در انت –

دومی نیمگ ءَ سندھ ءِ مزن شھر کراچی ءِ پریس کلب ءِ دیم ءَ بیگواھیں زاکر مجید ءِ چاردہ سال سرجم بوگ ءُ ھشت جون بیگواھیں بلوچانی روچ ءِ درگت ءَ یک روچی زھرشانی روانک ءُبنجل جنگ بوتگ –

زھرشانی روانک ءُ بنجل ءَ بیگواھیں مردمانی کھول سیمہ بلوچ، سعیدہ بلوچ، بیگواھیں راشد حسینءِ مات سکی ساوڈ ءِ کھول ءَ ھوار نودربر، انسانی ھکانی باسک، سیاسی ءُ چاگردی باسکاں ھوار ھر تک ءُ پھتاناں سیادی داروکیں مردماں بھر زرتگ ءُ زاکر مجید ءَ ھوار درسیں بیگواھیں مردمانی یل کنگ ءِ لوٹ کتگ –