ھشت جون زورآنسری آوار جتگیں بلوچانی روچ
نبشتہ کار: باھڑ بلوچ
دی بلوچستان پوسٹ
بلوچستان ءَ بوکیں زلم ءِ دراج کشیں سپر ءُ جنگی جاوراں مرچی جمک پیر ءُ ورناہ چُک ءُ زالبول سانمند کتگ اَنت، ھمے جاورانی برورد ءَ یک نیمگے بلوچے اگاں کوہ ءُ تلارانی نام ءِ اِشکنگ ءَ سرمچارانی ترانگ ءَ کپ ایت پہ شان پھریگ بیت تاں دومی نیمگ ءَ پاکستان ءِ ناروائیں زوراکیاں مھلوک ءَ را دلترْکی ءُ زھنی نادراہیانی آماچ کتگ۔ اردیں جنگ ءُ گلامی، ایردستی ءُ زورگری ءِ پشدر چارگ ءُ وانگ بیت تاں گندگ کئیت یکیں وھد ءَ اُود ءَ دو تب مان ایت یکے ڈیھ پھازیں پُسگ کہ وتی درئیں زند ءَ پہ راج ءُ زمین کربان کن اَنت، دومی نیمگ ءَ باجوئیں ءُ بے شرپیں کرد گندگ کاینت ھمے وڑ ءَ مروچی بلوچ چَرے جاوراں گستا ءُ جتا نہ اِنت-
ھشت جون ءِ پشدر: چونھا ھشت جون بلوچ ورنایانی گل بی ایس او آزات ءِ نیمگ ءَ چہ 2017 ءَ آوار جتگیں بلوچ مھلوک ءِ روچ نامینگ بیت، اے روچ ءَ گل ءِ گوستگیں مزن کمک کماش زاکر جان ءِ زورانسری آوارجَنی ءِ روچ اِنت، ءُ اے روچ ءِ دارگ ءِ من ءُ مراد زاکر جان ءِ کربانیاں ھوار کلیں ھما سراں شرپ ءُ ستا بکشگ اِنت کہ آیاں وتی شپ ءُ روچ پہ بلوچ ڈگار ءُ پجار ءَ کھریں زندانانی باھوٹی کتگ اَنت بلے وتی گچینتگیں کشک ءَ چہ پُشت کنز نہ بوتگ اَنت۔ھشت جون ھمے کشک ءِ شاھسواریں مساپرانی نام ءَ اِنت کہ پہ آجو ءُ ایمنیں ڈگارے ءَ لٹ، ازیت ٹارچر ءَ ھوار زورگیریں پنجاپی ءِ ھمک ناراوائی ءَ اوپار کنگ ءَ اَنت ءُ آجوئی ءِ واب ءُ ملارانی ساھیل ءَ اَنت۔
چَرے گپ ءَ کَسے بے ھیال مہ بیت کہ چشیں بامرد ءُ تمردیں جھدکارانی درگت ءَ روچ ءِ دارگ ءَ چہ آیانی دیستگیں واب ءَ را راستی ءِ نیمگ ءَ برگ گیشتر ارزشت دار ایت بلے اے راستی ءَ ابید، راجی بندپتر ءُ جُنز جتاجتائیں چیدگ جوڑ کن اَنت ءُ راجی چیدگانی یات کنگ ءُ آیانی بابت ءَ مھلوک ءَ سرپدی دیگ اوں راجی جُنز ءِ بھرے پمیشکا ھشت جون ءَ بی ایس او آزاد ذاکر جان، چئیرمین ذاھد جان ،شبیر جان ءُ مچ ھما سنگتاں گیر کار ایت ءُ آیانی شرپ ءُ بستار ءَ بلوچ ءِ دیم ءَ پدر کنت کہ آیاں پہ اے مِسکیں ھاک ءُ مھلبیں ڈگار ءَ مرگ کوپگاں بستگ ءُ زندگی ببا داتگ۔چوشکہ بی ایس او آزاد ءَ بلوچ جُنز ءُ بلوچ مھلوک ءِ سیتاں گوں بندوک بوگ ءِ مسام کتگ،پَرے ھاتر ءَ بی ایس او آزاد ءَ وتی جوڑ بوگ ءِ روچ ءَ بگر داں روچ ءِ مروچی زورآنسری آوار جتگیں ، سنگتانی شھادت ءُ آیانی سر ءَ بوتگیں زوارکیاں پہ جُنز ءَ اوپار کتگ ءُ کنگ ءَ اِنت بلے ھما کشکے ءَ چہ تُشے پُشت کنز نہ بوتگ کہ پرائی ءَ سنگتاں زند ءُ مرگ ءِ سپر بستگ۔
جنزانی بگیری ءَ زورآنسری آوارجَنی: چوناھا نہ تھنا بلوچ اے شُمیں وئیل ءِ آماچ اِنت بلکیں دنیا ءِ بازیں ھند ھست اَنت اُود ءَ اگاں راجی جنز یا گھگیری ءَ سر چست کتگ گڑا آیانی بگیری ءَ استان ءُ استانی ادراھاں اے پمیں زوراکیں ءُ ناروائیں پالیسی کارمرز اِتگ کہ استان ءِ ھلاپ ءَ پاد اتکیگیں جُنز بہ تَمیت ءُ ھلاس بہ بیت، اگاں گوستانکی ھوالہ ءَ چارگ بہ بیت تاں سما بیت کہ 1970 ءِ وھد ءَ ارجنٹینا ءَ راجمانی ءُ سیاسی جیڑھانی سر ءَ وھدے کمیونسٹ لیکہ ءِ منوگر (Montoneros ) استانی ناروائی ءِ ھلاپ ءَ گوریلہ جنگے ءِ نیمگ ءَ جنز اَنت ءُ سوشلسٹ استانے ءِ لوٹ ءَ کن اَنت، گڑا اے پاد اتکگیں زرمبش چاگرد ءِ تیوگیں مھلوک ءَ سانمند کنت ھمے سوب ءَ وھدے استانی ادارھاں اے سما کپ ایت کہ ما نوں مھلوک ءِ مڈیاں ءُ آیانی جند ءَ گیش لوٹ ءُ پانچ کُت نہ کنیں گڑا 1976 ءَ استانی لشکر مھلوک ءِ سر ءَ مزنیں کچے ءَ زوراکی ءَ بندات کنت (ایش استانی زوراکی ءُ ناروائی مرچی سِلؔیں جنگ (dirty war) ءِ نام ءَ یاد کنگ بیت ) اے جنز ءِ ھلاپ ءَ مستریں استانی پالیسی زورآنسری آوارجنی بیت 1976 ءَ بگر داں 1983 ءَ استانی لشکر کم چہ کم سی ھزار ءِ کچ ءَ مردم آوار جنت، بلے مردمانی آوار جنگ مھلوک ءِ دِلاں استان ءِ ھلاپ ءَ گیش کینگ ودی کنت۔ گوستانک ءَ میان اُستمانی دنیا ءَ مردمانی زورآنسری آوار جنگ ءِ بھتام کولمبیا، سریلنکا، عراق، سیریا میکسیکو ءَ ھوار ارجنٹیا ءِ سر ءَ اِنت ایشی ءَ ابید کسے اگاں گوستانک ءِ رد ءَ ھستیں جُنزوکیں ایدگہ جُنزانی ھلاپ ءَ استانی زورآنسری آوار جنی ءِ پالیسی ءَ بچار ایت گڑا ھمے پدر بیت کہ جُنزاں نزویں لیکہ ءُ کار ڈؤل تاوان دنت نئیکہ دژمن ءِ زوراکی انوئیں اھد ءَ مستریں درور بلوچ جُنز اِنت کہ آئی ھزارانی کچ ءَ مھلوک زندانی اِنت ھزارانی کچ ءَ کشگ ءُ ژانگولیں جون چگل دیگ بیتگ انت بلے ابید ءِ نزور بوگ ءَ بلوچ جُنز روچ پہ روچ گیش ودان اِنت ءُ گیشتر مھکم بوان اِنت۔
بلوچ مھلوک ءِ زورآنسری آوارجنی: بلوچ ءُ پاکستان ءِ سیادی چہ ایردستی ءُ زورگیری ءَ بندات بیت پاکستان وھدے بلوچستان ءَ پہ زور کبزہ کنت ءُ بلوچ ءَ وتی گلام دارگ ءِ جھد ءَ کنت گڑا بلوچانی پاکستان ءِ ھلاپ ءَ گھگیری ءِ سپر چہ ھما روچ ءَ بندات بیت ءُ راجی جنز بازیں دروشم ءُ تھراں سپر کنان ءَ داں روچ ءِ مرچی برجاہ اِنت بلوچ راجی جنز ءِ سوب ءَ پاکستان ءِ زلم ءُ زوراکی بلوچستان ءَ جتائیں وھداں، جتائیں رنگے ءَ برجاہ اَنت، زورآنسری آوار جنی راجی جُنز ءِ ھلاپ ءَ پاکستان ءِ گچینی پالیسیاں چہ پالیسی یے زورآنسری آوارجنی ءِ درچ ءَ پاکستان ھما وھد ءَ بندات کنت وھدے 2000 ءَ پد بلوچ جُنز گوں نوکیں رنگ ءُ گوناپے ءَ دیم ءَ کیت بلے اے دوئیں دھکاں اگاں اے پالیسی ءَ دلگوش کنگ بہ بیت گڑا گندگ ءَ کئیت کہ ھمے پالیسی بندات ءَ بگر داں روچ ءِ مرچی بدل بوان اِنت چوشکہ اے پالیسی وتی بنداتی روچاں چوش اَت اگاں کسے گرگ بوت گڑا کسانیں مدتے ءَ پد دیم ءَ آرگ بوت ءُ جیل کنگ بوت وتساچیں کیس جنگ بوت، پہ درور: 2005 ءَ وھدے ڈاکٹر اللہ نزر ، ڈاکٹر امداد( بی ایس او ءِ ھما وھد ءِ چئیرمین)، ڈاکٹر نسیم ءَ ھوار اختر ندیم زورآنسری آوار جنگ بنت ایش اولی رند اِنت سیاسی مردمانی برگ ءُ بیگواہ کنگ بنت، پاکستان ءِ ایش امل ءِ ھلاپ ءَ بی ایس او ءِ ورنا مزنیں کساسے ءَ روانک ، زھرشانی ءَ ھوار کراچی ءُ بلوچستان ءِ جتاجتائیں ھنداں ورنا شُد ھڑتالی کیمپ جن اَنت ، ایش امل بلوچ مھلوک ءَ سیاسی سنچ، راجدوستی، ءُ زورآنسری آوارجنی ءِ ھلاپ ءَ پاد آیگ ءِ سکین ءَ دنت۔ ھمے گھگیری ءِ برورد ءَ 13 اگست 2005 ءَ ڈاکٹر اللہ نزر گوں ھمراھاں دیم ءَ آرگ بیت ءُ جیل کنگ بیت پد ءَ کسانیں مدتے ءَ پد آجو کنگ بیت ۔ ھمے وڑ اے میان ءَ بازیں جھدکارے گرگ بیت ءُ پد ءَ چیزے مدت ءَ پد یل ءَ کنگ بنت پد ءَ ھمے جھدکار بلوچ جُنز ءَ مزنیں کرد پیلو کن اَنت، پاکستان اے کُتہ کاری ءِ کنگ ءَ پد ھمے سما کنت کہ منی اے پالیسی بے سوب اِنت بلوچ جُنز ءِ دارگ ءَ گڑا نوکیں پیشبندی یے ءَ گوں دیم ءَ کیت ۔
اے وھداں کہ بلوچ سیاست گراؤنڈ ءَ مھکمیں رنگے ءَ برجاہ بیت، بلوچستان ءِ دراھیں شھر ،بازار، کوچگ ءُ ھلکاں ھوار کراچی ءَ ھم سانمند کنت، بلوچ مھلوک ءِ آشوبی سیاست ءِ برجاھیں جُنز ءِ سروکی ءَ چئیرمین گلام مھمد ءِ وڑیں مزن نامیں رھشون اوشتوک بنت، بلے پاکستان بلوچ ءِ اے مھکم ءُ توانائیں سرپیس ءِ زرمبشت ءَ اوپار کُت نہ کنت ھمے سئوَب ءَ چئیرمین گلام مھمد ، لالا منیر ءُ شیر مھمد ءَ 3 اپریل 2009 ءَ چہ کیچ ءَ آئی ءِ وکیل ءِ کار گِس ءَ آوار جنت شش روچ ءَ پد بزانکہ 9 اپریل ءَ آیانی ژانگولیں جون ماں مرگاپ ءِ مھلبیں دلبند ءَ دور دیگ بنت۔ چہ ھمدا پاکستان ءِ بلوچ ءِ ھلاپ ءَ نوکیں پالیسی بزانکہ گرگ ءُ کشگ ءِ پالیسی ءَ ھوار زورآنسری آوار جنگ ءُ سالانی سال زندانی کنگ ءِ درچ بندات بیت ھمے میان ءَ سدانی کساس ءَ نودربر، ڈاکٹر ، وکیل ، شاعر ءُ ادیباں ھوار استاد ءُ ماسٹر ھم گرگ ءُ کشگ بنت۔
چرے پالیسی ءِ کتہ کاری ءَ پد ، 2016 ءَ گندگ ءَ کیت کہ پاکستان ءِ ترندی روچ پہ روچ کم تران بنت ایشی ءِ یک سببے ایش بیت کنت کہ اے وھد ءَ سرپیس سیاست اوشت ءِ آماچ بیت، دومی ایش ھم بیت کنت کہ وھدے گراؤنڈ ءَ سیاست ءِ پابندی ءُ گیشیں زوراکیانی سبب ءَ گیشتر سنگت سلاہ بندیں جنگ ءِ نیمگ ءَ کہ رو انت گڑا پاکستان ءَ را گیشتر وس وس گِر اَنت داں یکبرے پد ءَ وتی زورآنسری آوار جنی ءِ پالیسی ءَ بدلی کاریت ایش بدلی تیوگیں بدلی یے گشگ نہ بیت نئیکہ زورگر ءِ تب ءَ مان اِنت کہ پہ ایردست ءَ رھم بہ کنت بلے گندگ بیت کہ استان ھمے مار ایت نوں بلوچ ءِ ھلاپ ءَ (سافٹ پاؤر )کارمرزگ پمن گیش پایدگ ءَ بہ بیت، ھمے وڑا گڑا استان اگاں کسے زورآنسری آوار جنت ءُ آئی ءَ بلوچ جُنز ءِ ھلاپ جوڑ کنت ءُ یل کنت اگاں آئی ءَ زور پہ وتی سیاسی نپ ءُ سیتاں کارمرزیت یا اے وڑ ھم بیت کہ کسے اگاں زورآنسری آوار جنگ بیت ءُ یل ءَ کنگ بیت بازیں ٹارچر ءُ لَٹ ءُ کُٹ ءَ پد آئی ءِ جند پیشیگیں مردم نہ بیت۔
آسر: زورگر ءِ گُڈی وس مدام ایردستاں گُٹ گیر کنگ انت اے گٹ گیری ءَ جتائیں دروشم ءَ زورگر کنت چرایاں یکے زوانسری آوار جنگ انت چَرے امل ءَ زورگر یکیں و ایردستاں ذھنی نادراہ ءُ ترس آماچی ءِ دیمپان کنت داں آئی ءِ ھلاپ ءَ سر چست کت مہ کن اَنت ءُ دومی وتی تاکت ءِ ھستی ءِ پدر کنگ ءَ پہ چُش کنت دانکہ آئی ءِ ھلاپ ءَ پاد اتکگیں جنز نپسیاتی نزور بہ تر ایت بلے زمین ءِ سوگند وارتگیں جھدکارے چہ ھچ پمیں تاکت ءُ بیماں نزور تر ات نہ کنت۔پاکستان بنداتی روچاں چہ ہمے پالسی ءِ سر ءَ کار کناں ءُ پیداک اِنت بلوچ ءِ چُشیں گسے پشت نہ کپتگ کہ آچرے آس ءَ رک اِتگ بلے بلوچ ءَ کہ جنگ بندات کتگ تاں ایشی آسر کنت اے میان ءَ آوارجنی گُشگ، ٹارچر ازیت ھرچی بوت کنت بلے بلوچ ءِ منزل آجوئی انت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔