سردار بھادر خان یونیورسٹی ءِ تہءَ نودربرانی نیمگ ءَ چہ وتی لوٹانی ھقءَ زھرشانی کنگ بیتگ۔
دو شمبے ءِ روچءَ سردار بھادر خان یونیورسٹی فارمیسی تک ءِ نودربرانی مزنیں کچے ءَ کلاسانی بائیکاٹ کنان ءَ زھرشانی کُتگ ءُ شھدربرجاہ ءِ واکدارانی بگیرءَ اوگام چست کُتگ۔
نودربرانی گُشگ اَت کہ آیانی ڈیپارٹمنٹ باز سال اِنت کہ پچ بیتگ بلے ایچ ایس سی آیاں منگ ءَ نہ اِنت کہ چریشی ءَ چہ آیانی پر ارژشتیں وانگی وھد زوال بئیگ ءَ اِنت۔
ھمے نیام ءَ یونیورسٹی پھازگی واکدارانی نیمگ ءَ نودربرانی زھرشانی ءِ دارگ ءُ زھرشانی کنوکاں گلینگ ءِ ھاترءَ بیھار دیان ءَ لٹ شاپی ھم کنگ بیتگ وھدیکہ دومی نیمگ ءَ رسانکدراں ھم اے زھرشانی ءِ کور کنگ ءَ چہ دارگ بیتگ۔
سردار بھادر خان یونیورسٹی بلوچستان ءِ تہءَ زالبولانی یکیں شھدربرجاہ اِنت۔ گیشتریں وانگی ءِ واک ءِ ردءَ اے وھدءَ شھدربرجاہ ءَ کساس 10 ھزار ءِ نزیک ءَ نودربر وانگ ءَ اَنت۔
نودربرانی نیمگ ءَ کنگ بیتگیں زھرشانی ءَ پد شھدربرجاہ ءِ تہءَ پھازگی ترند کنگ بیتگ۔ کیمپس ءِ تہءَ نگیگی ءَ پد مردمانی شھدربرجاہ ءَ آیگ ءِ سرءَ بندش کنگ بیتگ ۔