ایران: پاکستان، سعودی عرب ءُ ھندوستان ءَ ھوار ھلیجی ڈیھانی گون ءَ زری ھمسنتی ءِ شوربندی ءَ اِنت

ایران ءِ زری لشکر ءِ کماندار شھرام ایرانی ءَ گوشتگ کہ ایران، سعودی عرب ءُ سَے دگہ ھلیجی ڈیھاں ھوار پاکستان ءُ ھندوستان ءِ گون ءَ یک زری ھمسنتی ءِ کنگ ءِ واھگ ءَ دارگ ءَ اِنت –

ایرانی رسانکدر ءِ رد ءَ زری کمانداف شھرام ایرانی ءَ گوشتگ کہ دمگ ءِ ڈیھاں اے سرپدی بیتگ کہ دمگ ءَ ایمنی بس یک دومی ءِ کمک ءَ بیت اِنت-

درانڈیھی ھال سرکنوکیں ادارہ ءِ رد ءَ شھرام ایرانی ءَ اے ھمسنتی ءِ بنپتر ءِ بارو ءَ دگہ گپ نہ گوشتگ انت بلے آئی ءِ گوشگ ات کہ آ زوت ایشی ءَ دیم ءَ کار ایت –

نیول کماندار شھرام ایرانی ءَ گوشتگ ھما ریاست اے ھمسنتی ءَ ھوار بیگی ءَ اَنت کہ آیانی توک ءَ متھدہ عرب امارات، بھرین، قطر، پاکستان ءُ ھندوستان ھوار اَنت-

زانگ بہ بیت ایران بازیں ھلیجی ڈیھاں وتی ناوشی ءُ دلرنجیاں ھلاس کنگ ءُ وشانی ءِ نیمگ ءَ جھد ءَ اِنت –

دومی نیمگ ءَ بریکس ڈیھانی دری کارانی وزیرانی ٹولی ءَ سعودی عرب ءَ ھوار دگہ ڈیھاں ھوار کنگ ءِ واھگ ءَ دارگ ءَ اَنت-

اے ڈیھانی نیمگ ءَ ھما داب بوگ ءَ اِنت کہ میانی استمانی پھناتاں وتی توار ءَ مھکم کنگ لوٹ ایت-

عرب نیوز ءِ رد ءَ کیپ ٹاؤن ءَ پشمبے ءُ آدینگ ءَ برجم بیتگیں دو روچی کانفرنس ءَ سعودی وزیر ھارجہ شھزادہ پیسل بن پرھان ھم ھوار بیتگ –

سعودی وزیر ھارجہ شھزادہ پیسل بن پرھان ءَ بریکس ’ برازیل، روس، انڈیا، چین ءُ زرباری افریقہ ‘ ڈیھانی ٹولی وزارتی نیاد ءِ وھد ءَ کیپ ٹاؤن ءَ ایرانی وزیر ھارجہ حسین امیر عبداللھیان ءَ گند ءُ نند کتگ اش-