ھندوستان ءَ دو ٹرینانی وئیل ءَ بیران بیتگیں مردمانی کچ 233، 900 زدگ

ھندوستان ءِ اُستان اوڈیشہ ءَ دو ٹرینانی میان ءَ ترسناکیں وئیلے ءِ آسر ءَ کساس بیران بیتگیں مردمانی کچ 233 ءَ گیش بیتگ اَنت ءُ ھمے وڑ نُھ سد زدگ بیتگ اَنت-

این ڈی ٹی وی ءِ رد ءَ وئیل آدینگ ءِ بیگاہ ءَ بھونیشور ءَ چہ کساس دو سد کلو میٹر دور بالاسور ءِ ھند ءَ پیش اتکگ کہ مساپر بریں ٹرین ءِ بازیں بوگی پٹری ءَ سستگ ءُ جتا بیتگ اَنت-

ھمے وھد ءَ پشت ءَ آیوکیں یک دگہ ٹرینے ءَ کپتگیں ٹرین ٹکر جتگ –

اوڈیشہ ءِ چیف سیکرٹری پی کے جینا ءَ گوشتگ کہ یک سینی مال گاڑی ءِ وئیل ءِ آماچ بیتگ ءُ اے وئیل ھندوستان ءَ لھتے سالانی توک ءَ درستاں ترسناکتریں وئیل اِنت –

اے وئیل ءِ آماچیانی توک ءَ بنیگالورو ھوراہ سپارفاسٹ ایکسپریس، شالیمار چنائی سینٹرل کورومینڈل ایکسپریس ءِ دگہ یک یکے مالی گاڑی ھوار اَنت-

اوڈیشا ءِ چیف سیکریٹری پی کے جینا ءَ گوشتگ وئیل لولکتہ ءِ زرباری ءَ دو سد ءُ پنجاہ کلو میٹر دور بالاسور ءِ ھند ءَ شپ ءِ ساھت ھپت ءَ پیش اتکگ بیتگ-

وئیل ءَ پد سکیوڑی پٹ ءُ پول بندات کتگ داں انگت ءَ برجاہ اِنت ءُ بیران ءُ زدگ بیتگیں مردم نزیکیں ھسپتالان برگ بوگ ءَ اَنت ءُ درستیں ھسپتال جاڑیگ کنگ بیتگ اَنت-

اوڈیشا ءِ چیف سیکریٹری ءَ این ٹی ٹی وی ءَ گوشتگ کہ ریسکیور آپریشن ءَ اوڈیشا ڈیزاسٹر ریپڈ ایکشن فورس، پانزدہ آس کُش ٹیم، سِی ڈاکٹررز، دو سد پولیس کارندہ ءُ شست ایمبولینسش بھر زورگ ءَ اَنت-

سر وزیر نوین پاتینک ءَ وئیل ءِ درشان کنان ءَ یک روچے ءَ پرس دارگ ءِ جار جتگ –

وزیر ریلوت ایشونی ویشنا کمو پیسر یک ٹویٹے ءَ گوشتگ کہ ریسکیو آپریشن ءِ واستا برزی لشکر توار جنگ بیتگ –